عالم الحياة الزوجية - منتدى

المشتاق20 · 03-11-2009, 00:52

لقد اثار إهتمامي رسالة تتناقلها زوجات سعوديات عن اللي تبي الدلع والكلام الحلو وين تلاقيه. فحوى الرساله؛ إن اللي تبي الدلع تاخذ لبناني واللي تبي الكلام الحلو تاخذ سوري واللي تبي..... واللي تبي..... واللي تبي الأجر تاخذ سعودي. عاد الأخيره هي الشاهد.

معلومه أفتتح فيها رسالتي:
أنا من بيئة زراعية تؤمن أن الأرض الطيبة تعطيها تعطيك، وكثر ما تهتم فيها يكون الثمر أطيب.

إلى كل إمرأه سعودية تعتقد أنها مأجوره لأنها ماخذه زوج سعودي.....
إلى كل إمرأه سعودية تعتقد أنها فاقدة الدلع مع زوج سعودي.....
إلى كل إمرأه سعودية تعتقد أنها فاقدة الرومنسية مع زوج سعودي.....
إلى كل إمرأه سعودية تعتقد أنها فاقدة الكلام الحلو مع زوج سعودي.....
إلى كل إمرأه سعودية تعتقد أنها مظلومه عاطفيا لأنها مع زوج سعودي.....
إلى كل إمرأة سعودية تبحث عن زوج حق دلع ولا كلام حلو.....

أختي الفاضله:
إجلسي مع نفسك صباح يوم من الأيام بعد أن يغادر زوجك السعودي إلى العمل. راجعي يوم الأمس الذي مضى لحظة بلحظة، وأجيبي عن الأسئلة التاليه:

صباح الأمس الباكر؛ من أيقظ زوجك للعمل؟ أنت أم الساعة المنبهه؟
إذا كانت الساعة؛ أين كنتي؟
إذا كنتي أنتي؛ كيف أيقظتيه؟ وبأي صوت نبهتيه؟ وفي أي صورة كنتي عندما تفتحت عينيه؟
بعد أن استيقظ، ودخل الحمام للدش؛ هل وجد حمامه جاهز؟
لما خرج والأمل يحذوه في وجبة إفطار؛ هل كنتي جهزتي له إفطاره؟
(ولا كوب قهوه وكيكه على المكتب)
قبل أن يخرج للعمل؛ من أين أخذ ملابسه؟ (من بين يديك ولا من الدولاب)
هل ساعدتيه في لبسه؟ (وكشختيه وعطرتيه)
بعد اللبس (وقت الخروج)؛ هل من مودع؟ ولا أحسن إختاري أجابه واحدة مما يلي:
1- خرج وأنا نايمه.
2- صحيت من حركته في البيت، فتحت وحده من عيوني وقلت: وين رايح، العمل؟ بالسلامه.
3- كنت جالسه بالصاله، وهو خارج قلت له لاتنسى الأغراض اللي وصيتك عليها.
4- رافقته للباب، وكان وداع حار.
( تبين مساعدة، نحذف أجابتين؟ بس المشكله مانقدر نحذف إلا إجابه وحده بس!!!)

لما وصل المكتب (طبعا إذا قام يفطر الشباب بالمكتب عرفوا وش أنتي من حرمه)؛ هل أتصلتي فيه تتطمنين إنه وصل بالسلامه؟
تالي النهار وهو راجع البيت من العمل، دق الجرس ( معه مفتاح بس يبي أحد يفتحله و يحسسه إن له وحشه)؛ هل أستقبلتيه؟ وشلون؟
بدا ينزع ملابسه؟ هل كنتي معه ونزعتي له ملابسه و..و.. ثم علقتيها بالدولاب؟ (ولا منطوله بطرف السرير)
يبي يدخل الحمام وياخذ دش؛ (كرري السؤال حق دش الصباح).
بعد الدش يبي أسترخاء، رجليه تألمه من الوقفه طول النهار والمشي، جسمه هلكان؛ هل ريحتيه؟ (طشت مويه وملح وهاتك يا تدليك)
الآن يبي غفوه قبل الغدا، هل ساعدتي على توفير الجو الهادئ؟
لما صحي؛ هل وجد الغدا جاهز ولا هو اللي جابه معه من المطعم؟
بعد الغدا أكيد يبي شاي، هل قدمتي له الشاي، وجلستي معه سواليف، وكيف كان يومك؟
الآن فتره مستقطعه إلى الليل، وشلون قضيتوها؟
بالليل وقبل النوم على الأقل ساعتين (إذا فيه عيال أكيد ناموا)؛ وش كنت لابسه؟ كيف رائحتك؟ وشلون صورتك وهيئتك أمامه؟
خلال الساعتين: وش من جو عيشتيه فيه؟ يمكن تتابعون فلم ولا مسلسل وسواليف، بس الجو العام شلون؟
وقت النوم، وأنتي رايحه السرير؛ وش كنت لابسه؟ كيف وضعية النوم مع زوجك؟ (وضعية حنان ولا كأنكم أثنين أصدقاء أستأجروا غرفه بفندق وما لقولهم الا غرفه بسرير واحد (كنج بد) وكل واحد نايم بجهه)

بإختصار لكل الأسئله السابقه:
هل كنتي أنثى مع زوجك السعودي وعيشتيه جو زوج وزوجه؟

طبعاًَ هذى مو كل الأسئله المطلوبه من زوجه أنثى، لكن المهم منها والمطلوب حتماًَ وحق الزوج فيها.

إلى كل إمرأة سعودية تبحث عن زوج حق دلع ولا كلام حلو:
ضعي درجه من 100 على كل سؤال، ووزعيها بحسب الأهميه، ثم أجيبي الإجابه الصحيحه، ومن ثم اجمعي الدرجات التي حصلتي عليها.
كم مجوع الدرجات اللتي حصلتي عليها؟
0% ولا 10% ولا 50% ؟

طبقي النتيجه على المعلومه الزراعيه التي أعطيتها أول الرساله عن الأرض. إعتبري النتيجه هي نسبة إهتمامك بالأرض. والأرض زوجك كيف بتكون الثمره اللي تحصدينها؟

(الثمره أكيد الدلع والكلام الحلو و... و....) اسألي مزارع إذا احتجتي مساعدة.

في النهايه: أتمني من المرأه السعوديه اللي تبي الدلع ما تاخذ لبناني،

واللي تبي الكلام الحلو ما تاخذ سوري واللي تبي...واللي تبي....واللي تبي....

كفايه يكون في العالم العربي كله بس السعوديين محرومين من أنثى.

معلومة أختتم فيها رسالتي:

تعرفون ليه الزوج السعودي يفغر لما يشوف امرأه متبرجه وتطيح سعابيله.

تعرفون ليه الزوج السعودي لما يجلس وزوجته يتابعون التلفزيون وتطل المذيعه عيونه مفنجله بالشاشه.

تعرفون ليه الزوج السعودي لما يتزوج من سوريه ولا مغربيه ولا...ولا...

يحس ان فعلاًَ فيه جنس آخر بالكون غير الذكور.

لأنه في الأصل عايش مع واحد من (ربعه).

منقول من الواقع

و ان برأيي الشخصي انه لو فيه زوجة تسوي ما ذكر اعلاه ما راح زوجها يفكر مجرد تفكير بالزواج عليها الا اذا كان مجنونا او مريضا نفسيا

ملاحظة هامة / الموضوع طرح بهذا الاسلوب كتذكير للمتزوجين و المتزوجات و المقصرين والمقصرات فقط .

دمتم بوافر الودّ والمحبة

كل_غلاتي · 03-11-2009, 01:03

المشتاق 20

سلمت اناملك على هالنقل الجميل ...

فعلا موضوع في قمة الروعه والفائده....قد نستفيد منه نحن البنات الغير متزوجات في المستقبل

تقبل مروري ^^

اوتار القلوب · 03-11-2009, 01:07

تشكر على التساؤلات الرائعه الواعيه المنطقيه

لسعة شقآوه بدلع · 03-11-2009, 04:10

صحيح أي إنسان تعطيه كل شيء حلو...رآح تلقى منه الأحلى...فما بالك بين الزوجين
ياللا الله يوفق الجميع
وشكراً لك ع الطرح القيم

ع ـذابي غير · 03-11-2009, 04:26

عنوان معبر وواقعي

بالنسبه للأسأله الموجوده الله يعظم الأجر حنا بنلحق على طبخ ونفخ ولا على بزران ولازوج ارتز عند الباب لمى يجي واستقبله همن افصخه وادلك رجليه واروشه وانومه واغديه وشهويه ( على وزن اقهويه ) !!!

لا أنا من وجهة نظري بهالحاله لا ابي لارومانسيه ولاغيره اهم شي الصحه ولا الباقي بالجنه ان شاء الله < ابد ماتقصد شي

روانـ · 03-11-2009, 04:58

موضوع رائع جدآآ

تشكر عليه ونتبيه مهم للزوجات المهملات

سامحتك · 03-11-2009, 08:20

الله يعين الحريم خصوصا المعيلات ( يعني معهم اطفال)

فاتومي · 03-11-2009, 08:29

انا ماراح أجاوب لاني مو سعوديه

انا من الكويت

((الانوثه الطاغيه)) · 03-11-2009, 08:37

مشكور
وشفيه الرجل السعودي والنعم فيه طيب وحنون
وكريم والاهم من ذا كله يخاف ربه مهما كان وتحمد ربها اللي تتزوج سعودي
((تحيزلشباب بلدي))

نفسي ارتاح · 03-11-2009, 08:38

كلام واقع

الله يعين

*جودى* · 03-11-2009, 08:44

والنعم وسبعه انعااام والله..

سلمت يداك اختي ع النقل الطيب

ريما المجنونا · 03-11-2009, 08:55

والله ونعم وسبعة انعااااااااااااااااااام من الرجل السعووووووووووووووووودي
ورررررررررررربي اننا في نعمه
والرجل السعودي احسن من غيررره بكثير
فيه الرجوله والشهامه والغيررررره وهاذي اهم شى
وفي الاول والاخير
كل انسان في الزين والشين يعني اصابع يدك مو سووووووووووى
ويعطيك العافيه عالموووووضوع

ألا الخـيانه · 03-11-2009, 09:03

اللي يبي ياخذ لازم يعطي
الدنيا اخذ وعطاء

عذبني ابو سمره · 06-11-2009, 02:00

مرحبا - المشتاق 20
انا سويت تقييم لي وحطيت علامة على كل سؤال وطلعت نتيجتي (( 0 %))
تعرف ليش؛؛؛
لانه اذا صرت أن المنبه اللي بقومه الصباح وأنا اللي بجهز الحمام واجهز الملابس واساعد في تلبيسه(((قحاطير)))
وبجهز الفطور وبودع وبدق اسأل هو وصل ولا لا وبنظف البيت وبصلح الغداء همن استقبل واساعد في تبديل الملابس واروح ادلك واهده علشان ياخذ قيلوله واقومه من القيلوله واغديه واصلح له شاهي واسولف معه واسهر معه وووووووووو الخ
سؤال ::::
حواسه الخمسه وش دورها في حياته (((اتزوج معاااق افضل))) على الاقل اكسب من وراه اجر
سؤال ::::
متى بيمديني أشوف حالي وأشوف عيالي وأشوف اهلي واروح اتقضى الملابس اللي بقابله فيها

على كذا أجلس في بيت اهلي معززه مكرمه أكله شاربه نايمه قايمه طالعه داخله اسمع كلمه حلوه كل هذا بدون مقابل وغير كذا راتب في يدي أحسن من أقابل واحد كني عبدة عنده شاريها يبي يمتع نفسه
فااااااااااااااااااااااااااضيه ...كل هذا الذل علشان اسمع كلمة بس كلمة حلوه في بيت أهلي ابرك

عذبني ابو سمره · 06-11-2009, 02:18

تعرف ليش السعودي يفغر اذا شاف بنت متزينه لانه مشفوووووووح كأن البيوت مهيب مليانه من البنات بس السعودي مايملى عينه الا الترااب
واذا تبي تتزوج السوريه والمغربيه الله يهنيكـ ويعظم اجرك على الصنان والسحر.
علشاااان كذا قلنا نبي الاجر
واذا الرجل السعودي كل هالوقت بياخذ متى بيعطي >>>من مواريه مهب معطي ابد

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

اللي تبي الأجر تتزوج سعودي !!!