عالم الحياة الزوجية - منتدى

وسن1 · 31-08-2005, 14:30

بكل الحب/الحزن

/
\
/
\
/
\

لها / لي / لكم جميعاً الف رحمة ..!!

/
\
/
\
/
\

آآآه يمّه
مدري ليش ..!!
كلّما يمّمت وجهي .. صوب صوتك
فزّ لي طير الحديقه
و لاح لي حزن الحشيش ؟!!
صار يصفعني بحقيقه
و ينهدم حيل العريش ؟!!

يمّه ليش؟؟
صارت الدنيا ليالي
و إستنارت بالظلام ؟؟
إستجارت في خيالي ..
من تباريح الكلام
و في خيالي
ريح خوفي .. هبّت أقسى من ملام
أجبرت صورة قديمة
تغتصب لحظه حميمه
من مجالي .. و ما تبالي بإبتهالي
تفتح جروح المسام
و تنزف القصه الأليمه ..
بكلّ طيش ..!!

يمّه ليش؟؟!!
يكسر الخاطر مكانك..!
مشتهي رجعة حنانك ..
كل جروحه مستليمه

هذا باب البيت صابر
و ذاك حوشه .. كان عامر ..
كانوا أصحابه و حوشه ..!!!
حفنة تتبارى و تغامر
لأجل خبز ايدك تحوشه ..
و به تفاخر
و المناظر ..
فيها نفحة ياسمينك
منسجم مع ... ودّ فاخر
لاحلى ذكرى .. و طيف عابر ..

كل شعورٍ إكتساها ..
كان يلوّح لي .. يناظر ..!!
و ينبش الغافي في عيني ..
ذاكرة سيل المشاعر

يمّه ليش ؟؟!
يقطع نياط الأثير ..
مطبخٍ قلبه ِكسير
و كل مساند .. غرفة الشايب غرايب ..؟!!
شاحبه .. ما هي بخير .؟!
ترتدي اللون الرمادي
و ماهو عادي
صمتها !! فاضح .. كئيب ..!!
شيئ غريب !!

يمّه أدري ..
من صفاتك يخجل إحساس المرايا
و أدري إنّك
في الرزايا .. ينتعش في ايديك جيش
إيه و أدري
, في عيونك .. تبدا هاللحظة صلاتك
و كل جهاتك
تدعي للغايب يعيش ..!!

يمّه قومي ..
ردّي للبيت إبتهاجه
رجّعي للنور تاجه
شوفي ف عيون الزوايا
كلّ نظره تريد حاجه .!!
شوفي ارجاءه مريضه
تشتكي فرقا بغيضه
و يمّه في صوتك علاجه
.
.
.

يمّه في صوتك علاجه ..!!!

.
.

رحمها الله

\
/
\
/
\
/

هنادي الجودر

عاشق الجنان · 31-08-2005, 15:25

روعة

وحيد الهم · 31-08-2005, 21:59

تسلمين وسن على الاختيار المميز

NAJLA ALI · 02-09-2005, 05:05

يعطيك الف

الــــف عــافـيـه

كلمات رئعه

لك تحياتي

نجلاء

وسن1 · 03-09-2005, 13:43

عاشق
وحيد الهم
نجلاء علي

مشكورين

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

~ * ~ شمعة البيت ~ * ~

**~ * ~ شمعة البيت ~ * ~**