عالم الحياة الزوجية - منتدى

مسكين حالي · 08-09-2005, 18:06

عندي قضيه او اعتبرها مشكله لانسانه عزيزه ومقربه على قلبي واللي هي صديقتي
صديقتي كانت مسافره مع والدها العمره مع حمله وصاحب الحمله عنده حفيد يقوم بكل الاعمال تقريبا لانه ماشالله عليه يعتمد عليه كان حزتها هيه عمرها 17 سنه وهو 16 لكن اللي يشوفه يقول ماشالله عليه كانه 20 سنه وعلى حسب كلامها انه فيه وايد بنات في الحمله وهيه من النوع اللي ماتعطي ويه او اهميه يعني تتجاهله وتتجاهل غيره طالعه علي البنت

المهم حست من نظراته وتصرفاته اهتمام كثير فيها مع العلم انه دوم مع ابوها ويكلمه ويقوله اذا احتجتوا اي شي انا مستعد ومادري كيف ووالدها اعجب بالولد المهم من ضمن الحمله زوجه ولد عم ابوه وكان موصنه عليها اذا احتاجت شي لانه ماراح يروح معاها وكانت شاله معاها بنتها الصغيره وصديقتي تعرفت عليها لانها ماكانت تعرف حد في الحمله وظلت معها على طول والولد استغل هذي الفرصه وظل على طول يتابعهم ماتبون شي ومن هذا الكلام وكله على شان منو على شان ربيعتي وظلت هي مسوتله طاف من الخاطر مع العلم انه فيه بنات كانوا معجبات فيه ....بتقولون يهال ويغازلون بعد

؟؟

المهم ظلت تروح مع زوجه ولد عم ابوه وهو دوم يرافقهم على اساس انه عارف الاماكن اللي مكه والاسواق وهيه بصراحه ابدت اعجابها فيه بس ماحسسته وهو دايما يلمح وهيه طاف عامله حالها نقيله البنت

واستوت مواقف كثيره يعني اتاكدت من خلالها انه يحبها بالفعل واخر يوم من السفره شافته حزين كانه يبكي بس بعد مااهتمت ظلت ساكته في نفسها برغم اني بقولكم حبته وهيه حاطه في بالها انه حب مستحيل لانه هيه اكبر عنه بـــ8 شهور تقريبا .
المهم مرت السالفه وكل حد سار في صوب وظلت على علاقه بزوجه مرت عمه تكلمها ومادري كيف وهيه بنفسها قالتلها حسيت انه فلان مهتم فيج يمكن يحبج والبنت تقوللها مااظن
مرت خمس سنوات 3 سنوات تقريبا عن السالفه ومحد يعرف عن بعض شي وهيه كانت تفكر فيه وماتدري اذا هو يفكر فيها او لا وعقب قالت انا ليش متعبه نفسي على انسان مااعرف شو شعوره تجاهي
بس كانت تسمع من ناس انه كانت له علاقات مع بنات يعني ع التلفون بس وهيه كانت تقول سبحان الله ماتجرأ حتى يدق مع انه والده يعرف والدي
المهم اول سنه لها بالجامعه تفاجأت مره على المسنجر بحد ظايفنها قالت منو معاي قاللها الاسبوع الجاي دشي الوقت الفلاني والساعه الفلانيه وانا راح اقولج منو انا
خافت البنت وسوت مسيره وكانت خبرتها بالنت قليله جدا وخبرت البنات الربع كلهم في حد ظايفني وانا اقوللها اثقلي شوي شو بيقولون مطيوره اول مره تتكلم على المسنجر

المهم دخلت وكلمته وهيه اصلا ماكانت تعرف انه واحد ومن عرفت قالتله عفوا سوري على البلوك بس انا مااكلم شباب وفعلا هيه مب من هذا النوع الحمد لله مستقيمه وعارفه ربها
كلمها بكل شي وصارحها وقاللها انتي فلانه بنت فلان فانصدمت قالت منو انت قاللها انا فلان ولد فلان انصدمت البنت وين جبت الايميل قاللها اللي يسال مايتوه مع العلم انه فنفس الجامعه اللي كانت تدرس فيها اخته موجوده وكانت عارفه بالسالفه لانه صارح اخته وهيه بدال ماتتجنب واحد كانت تتجنب 2 اخته وهو
المهم قاللها اقسم لج بالله العظيم اني ماقد حبيت وحده غيرج مروا علي بنات ومابكذب عليج شفت وكلمج بس من شفتج حسيت انه مافي غيرج يصلح يكون شريك حياتي وهيه تقوله ماينفع انا اكبر عنك قاللها الحب مايعرف لا صغير ولا كبيرومعظم اخوانه متزوجين باصغر عن زوجاتهم وقاللها انا حبيتج من اخلاقج وحسن تصرفج لا اهتميت لشكل او شي ثاني مع العلم انه صديقتي حلوه ماشالله
المهم اتاكدت من مشاعره وهو فعلا يحبها حب مايقدر اي واحد يتخيله ولا لجأ لتيلفون مع العلم انه قالها اختي عندها رقمج ولافكرت اشوفه او ادق وقالتله يعني الحين المسنجر الحل بعدنا في الحرام قاللها انا ماكلمتج الا لاني ابغي افهمج موضوع واحد اني من عرفتج مش طبيعي وظلت علاقتهم وخلص الولد دراسه وسافر برع بريطانيا يكمل دراسته وهيه كانت سنه ثانيه في الجامعه وظل يكلمها بين فتره وفتره وهيه تتجنب وفاتحها بموضوع انه مب عايبنه حال المسنجر ووعدها بالزواج لدرجه انه كل يوم يمر جدام بيتهم وحتى درويلهم ماسلم منه قام يقوله وين ساروا اصحاب البيت يوم مايشوف سيايير جدام البيت حبها حب جنوني بصراحه وهيه كل مره تدخل تحاول تقنعه انه مساله العمر تسبب مشكله عند اهلها وماراح يوافقون ابدن حتى لو كان ريال صالح قاللها مستعد ازور تاريخ جوازي بس ابيج ولو انه مش مهم قاللها خليها على الايام وهيه تعبت من كثر ماتشرحله
هيه تحبه واكتشفت انه يدوخ من كثر ماتعب وحذرته ووعدها قاللها اترك كل شي علشانج بس اعتقد انه ماترك والحين هيه خلصت دراسه وقاعده ويطرشلها ايميلات لكنها ماترد عليه ابدن وهيه تتالم بس تشوف انه هذا الحل الصواب يعني الحين هو نازل من بريطانيا يقدر يخطبها ليش كاتبلها ابغيج في موضوع مهم يعني يبا يستأذنها اذا يخطبها اولا يااخي تعال وانت ساكت ليش المقدمات هذي وصارح اهله وكل حد عارف بس خوفه من الرفض لانه عمره 20 وهيه 21 وبيني وبينكم وايد يتقدمولها وكله ترفض هذي المره في واحد متقدملها وشبه بتوافق ولا ردت على ايميله اللي كاتب فيه كلام بصراحه يقطع القلب واخر شي ينصدم انه حبيبته تزوجته شو بيفسر تصرفها اكيد خيانه لانه كل الرجال تفكيرهم مثل كذا
سؤالي كيف تتصرف ترد على ايميله وتقوله بتزوج وخلاص صدمه قويه بتكون وهو ماسافر برع ولا جمع امول الا علشانها اخر شي يتوقع منها كذا هيه محتاره بين القلب والعقل بس عقب تفكير قالت احبه بس مش كزوج لانه يدوخ واصغر لاتعتبرون ردها على اساس انها ماتستاهله انا وياها ومعاه موقفي محايد
الحين تكلمه على المسنجر وتقوله السالفه كلها او تكتبله ايميل افضل وتخبره وشو بيفسر ردها؟؟مع العلم انه قايللها اذا تزوجتي اول انسان بفرحلج وراح اسال عن الولد بعد والله يوفقج ماتتخيلون شقد اخلاق بس الله يوزع ارزاقه على عباده ومحد بياخذ غير نصيبه
طولت عليكم بس الله يخليكم خذوا قضيتها بشكل جدي شوي ....لانه التسرع في مساله مثل كذا ممكن تسبب معاناه ازليه
والخوف انه كان بينهم ايميلات ومره طلب تحطي صورتها وهيه رفضت وزعل وعقب عاد لصوابه وسكت بس كان بينهم ايميلات وهو مامسح اي شي بس تحلفلي انها واثقه منه ثقه عميا انه ماراح يسوي شي وويتابع اخبارها من كثر مايحبها يسال عنها حتى اي حد المهم يتعذب اذا ماسمع لها خبر..

شو رايكم ولو اني طولت عليكم
قسموا القصه على يومين واكتبوا الحل اليوم الثالث

اختكم
مسكين حالي

قموره 11 · 08-09-2005, 18:19

الحل انها تنساه خلااااااص وتتزوج هاللي متقدم لها

HaVeN · 08-09-2005, 21:54

أختي جميل منك اهتمامك بصديقتك والبحث عن طق لمساعدتها.

فرق سنة واحدة او اقل ليس بالشيء المهم....المهم إن كانت تحبه فعلا ومتأكدة من صدقه فلترسل له ايميل تشرح فيه وضعها وخطبتهاالوشيكة ...إن كان يريدها فسيتقدم لها وإلا فلترضى بمن تقدم لها الآن

لا تناقش ولا تتمادى معه.

أختك في الله

رجل خير · 08-09-2005, 22:26

بسم الله الرحمن الرحيم
قال تعالى ( وليس البر بأن تأتوا البيوت من ظهورها ولكن البر من اتقى وأتوا البيوت من أبوابها واتقوا الله لعلكم تفلحون )
أولا أنا في البداية أتفق على أن السن لا يمثل أي مشكلة في هذا الموضوع
ولكن نصيحتي بصراحة هي أن تترك هذا الشاب وتلتفت لغيره لأني بصراحة أشك في سلوكه
الإنسان الذي يسعى للزواج بطربقة شريفة لا يحتاج أن يلف ويدور ويحتال على الناس في الرحلات ويرسل إيميلات كل هذا بصراحة يدفعني للشك فيه
لو كان يريد الأمر بجدية كان توجه إلى أهلها وطلبها وحاول معاهم
أما أنه يحاول يلف ويدور بهذا الشكل فهذا مرفوض تماما
ما أدراك يا أختي كما أنه يخاطبها أنه يخاطب أخريات غيرها أنا أعرف أشخاصا يواعدون كل يوم عشرات من البنات على الزواج كذب في كذب
إذا كانت كلماته تقطع قلبها فهو ضحك عليها مئة بالمئة
هل ترضى هي بعد زواجه منها أن تفاجأ بأنه طلب صورة لإحدى الفتيات التي يحدثهن على النت وربما تجدها في جيبه هل تقبل؟
إننا بصراحة أحيي تلك الفتاة على عفتها ورفضها كل محاولاته ولكن نصيحتي لها أن تترك هذا الشاب وأن توقف الرد على إيميلاته وتتجاهله تماما ليس بسبب السن ولكن لأنه لم يدخل البيت من بابه
وأحييك أختي على اهتمامك بصديقتك وعليك بالدعاء لها

الطيبة · 08-09-2005, 22:41

أعتقد أن فرق سنة وحدة ما يأثر والله

انصحها تصلي صلاة استخارة و اللي الله رايدنه بيصير ان شاء الله

مسكين حالي · 09-09-2005, 00:04

قموره 11

اختي قموره سرني تفاعلج وردج ع الموضوع.....واحترم رايج بس هل يوم بتنساه وبتتزوج غيره مابيفسر انه اللي سوته خيانه؟؟
هيه عارفه انه يحبها وهو عارف بعد ويمكن كان نضجها صغير شوي فوعدته انه تفكر في الامر وتوافق ان شالله وماترى بغيره بس البنت لين متى بتظل تنتظر اذا بعده 20 سنه واهلها مب خبايل يزوجونها واحد صغير بهذا السن ومااستوت في عائلتهم انه وحده خذت اصغر عنها او العكس

مسكين حالي · 09-09-2005, 00:08

start

اسعدني اطرائج ياالغاليه بس هيه شالت فكره انه يكون كزوج الها مب لانه مايستاهل او ينقصه شي لا بالعكس مايعيبه شي سوا السن وانه يدخن وهذا طبعا محد يرضاه تحبه صح بس مع الايام حست انه ها الحب يمكن يتحول لغيره وتحكم في المستقبل بس بعد بتظل تحبه وتدعيله بس شو بيكون موقفه لو عرف انها تخلت عنه بهذي الطريقه....الريال مايرحم الحرمه ومابيلقالها اي عذر ؟

مسكين حالي · 09-09-2005, 00:18

رجل خير
كم تسعدني ردودك الكافيه والوافيه اقولها وبصدق
بس اباك تعرف شي واحد يااخي انا يوم كتبت انه يحبها بالفعل يحبها حب ماتتخيله ولا يخدعها انت لو تعرف شكثر يغار عليها حاول يتعرف على اخوانها علشان يتقرب منها مستقبلا فاتح ابوه وامه بالموضوع على اساس انهم يحجزونها له ويظل مطمن وهو برع ووالده على طول وافق وامه رحبت بالفكره بس وعدوه عقب مايخلص لانه مستحيل يرضون اهل البنت بواحد صغير هم مش عيزانين عنها علشان يخلونها لواحد اصغر عنها ولا هي ناقصنها شي علشان محد يتقدملها والحمد لله بس من خلال السؤال بيعرفون انه يدوخ وهذا عيب واحد وانه صغير وطبعا مستحيله الفكره فهيه قالت مابدخله في دوامات عارفها شو عواقبها ومابا احطيه في موقف محرج وبكون انا اللي رافضتنه مع كل الاسباب المذكوره ........مساله العمر مشكله اللي متقدملها اكبر عنها ب 10 سنوات والبنت لما تاخذ واحد ناضج يحطيها في عيونه اذا كان زين يعني كبير وفاهم الدنيا عدل احسن من صغير وفيه عيب انه يدخن والا شو رايك؟؟
انا مساله الصوره مااصر بس كان يبغي يشوفها اذا تغيرت او لا ؟؟ومن عرف انها عصبت ماعاد فاتحها ابدن...وبالنسبه الى انه يعرف غيرها مايعرف وانا شخصيا اقولك اياها صارحها في البدايه بدون ماتساله مع انها عارفه لكن يوم صارحها قاللها بنفسه بدون ماتساله كل شي قاللها وكان اي امر عسير عنده خبرها ومعتبرنها الكل بالكل لدرجه انه فكر مره يمر يسلم على والدينها يحبهم مثل مايحب بنتهم
اخافكم تظلمون ربيعتي وتقولون هيه اللي تخلت عنه لا والله بس البنت لما تنتظر تتعطل حتى لو كان مستقبلها مظمون وياه الريال مايتعطل ومايعيبه شي وحتى لو تزوج وهو في الاربعين

مسكين حالي · 09-09-2005, 00:21

حبيبتي الطيبه
انتي تقولين ماياثر فرق سنه الحرمه لو كانت اصغر عن ريلها مع الايام تكبر وتغدي شرات امه،هيه بصراحه ماصلت استخاره له صلت لغيره يعني اللي متقدملها ولين الحين الامور ماشيه
ونسيت اقول شي انه اللي يحبها اول مارد من العمره صلى استخاره وارتاح للبنت حس برغبه انه يبيها على سنه الله ورسوله
بس هيه ماصلت علشانه لانها عارفه شو ردها صح محتاره بس عارفه هيه اذا كانت تباه او لا ؟؟

وسرني ردج حبيبتي على موضوعي

سهيلاااا · 09-09-2005, 00:47

يلا تتركه عن حب احسن..
قبل ماتتغير الاوضاع..

واكيد مادام مايهمه الا اخبارها بيعيش من غيرها ومااحد بيموت بموت احد..

واعتقد(برايي الشخصي)الحب وهم ودائره ندخل انفسنا فيها بارادتنا..

مسكين حالي · 09-09-2005, 01:07

سهيلاااا
سرني ردج يالغاليه ....ورايج ماخوذ بالاعتبار

الدبلوماسي · 10-09-2005, 10:46

دام ان هيه شالت فكره انه يكون كزوج لها .
اجل ماعاد فيه فائده من هذا الحب
تتزوج اللي تقدم لها ودخل مع الباب
والله يوفق الجميع للخير

مسكين حالي · 13-09-2005, 07:12

الدبلوماسي
مااجمل ردودك المختصره واللي تحمل حل منطقي شرفني اخوي العزيز ردك على موضوعي

بس اللي عرفته منها انه هو تقدموكلم ابوه علشان يكلم ابوها بس في الفتره هاذيك كانت عندهم ظروف وسافروا فابو الولد استحى انه يكلم ابوها في ظروف مثل هذي؟مع اصرار الولد راحله مره ثانيه ومااعرف شو صار
وفي شي يديد بعد انه الولد ترك التدخين من فتره احتراما لطلب البنت ولانه قالوله لما يسألون عنك بيعرفون انك ادخن قال مب بس الا بترك التدخين بعطيها عمري لو تبيه؟؟ومابكذب عليكم كانت تفكر في اللي متقدملها والحين حايره بينه وبين اللي يحبها لدرجه انها قامت تبكي ومب عارفه شو السبب محتاره وايد والناس يبون الجواب على اللي متقدملها لانها فعلا طولت في الرد والكل مستغرب
سؤالي؟ليش جاها هذا الشعور مره وحده وتحس بنغزات في قلبها مع العلم انه الاستخاره كل يوم تصليها علشان اللي متقدملها ومن كثر حرصها وخوفها قالت حق امها تصلي عنها امها شافت انه الولد اللي متقدملها مش حبيبها جاي البيت وكان فيه رجال ويتكلمون في موضوع الخطبه
السؤال يقول توافق تاخذ اللي يحبها حب جنوني واللي يصغرها باقل من سنه تقريبا وماراح يعيش سعيد بدونها؟؟او انها تاخذ واحد اكبر عنها ب9 سنوات ونص وماتعرفه ولا يعرفها وماعرف كيف بتكون حياتهم؟؟

الدبلوماسي · 13-09-2005, 09:28

يالغاليه

اقتباس:

السؤال يقول توافق تاخذ اللي يحبها حب جنوني واللي يصغرها باقل من سنه تقريبا وماراح يعيش سعيد بدونها؟؟او انها تاخذ واحد اكبر عنها ب9 سنوات ونص وماتعرفه ولا يعرفها وماعرف كيف بتكون حياتهم؟؟

الحيره بعض الاحيان تقتل الانسان وتزيده شقاء وبؤس
وانا اشوف انها تأخذ الجاهز ، ولا تتردد
اما موضوع السن ( عند الاثنين ) فليس بمشكله ابدا
مع تحياتي

مسكين حالي · 13-09-2005, 11:41

اقتباس:

المشاركة الأصلية كتبت بواسطة الدبلوماسي

يالغاليه

الحيره بعض الاحيان تقتل الانسان وتزيده شقاء وبؤس
وانا اشوف انها تأخذ الجاهز ، ولا تتردد
اما موضوع السن ( عند الاثنين ) فليس بمشكله ابدا
مع تحياتي

اخوي الغالي الدبلوماسي
بارك الله فيك على حرصك واهتمامك في الرد على مواضيعي خاصه ومواضيع الاعضاء عامه وسرني تكرار زيارتك لموضوعي،هذا ان دل على شي فاني يدل على طيب اصلك يالغالي ومابجذب عليك ردرودك وايد تعجبني حتى لو كانت على شكل ضحك او جديه
الظاهر اني بحاول اقناعها بالجاهز

لانه اللي يحبها بعده يدرس برع ولين مايرجعبتمر سنه والا البنت شيبت

؟
والعمر كانت مسوتله الف حساب بس في موقفها المحير هذا
ما عادت تفرق بين عمر ولا عبد الله

والله يكتب اللي فيه الخير ان شالله

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

الله لا يهينكم...لاتبخلون علي بالحل السديد