عالم الحياة الزوجية - منتدى

مسكين حالي · 02-10-2005, 03:43

اول شي احمد ربي اني تعرفت على هذا المنتدى اللي فيه اعضاء وعضوات مايقصرون في طرح بعض الاراء اللي من شانها انها تحل بعض المشاكل او القضايا العاطفيه

مشكلتي وباختصار اني تعرفت على واحد في فتره السفر والله العالم اني اعتبرته مثل اخ لانه يصغرني بسنه تقريبا بس ماشالله من شكله يبين اكبر ومن تصرفاته واخلاقه ونسبه الطيب اعجبت فيه ومااخفي عليكم هذا الشي بس كنت حاسه انه هو يبادلني مشاعر الاعجاب بل اقدر اقولكم انها وصلت للحب من طرفه بس من ناحيتي كنت
افكر فيه لاني اصلا انعجبت فيه بس مافكرت فيه كشريك وكانت وحده من اهله فنفس غرفتي سألتني مره لو فكر يتقدملج بتوافقين قلتلها لا قالتلي شو المانع قلتلها اصغر عني واهلي مايرضون اني اتزوج اصغر عني وثاني شي انا اعتبره مثل اخ قالتلي بس هو يتردد وايد ويتعلث باي شي بس المهم يشوفج وانا كنت حاسه اصلا بس مااعيره اي اهتمام مجاملات بسيطه على اي خدمه يقدمها.......وبما اني اكبر عنه في المرحله الدراسيه سالني مره عن نسبتي لما كنت بالاول ثانوي قلتله 94 % اندهش وذكر الله وعلى طول قالي اريد كتبج لو تسمحين قلتله لما نرجع البلاد راح
اشيك عليهم واخلي فلانه اللي كانت معانا بالسفر تبعثلك الكتب قالي اوكي
لما رجعنا البلاد حسيت بتغيير كبير حسيت اني اريد ابكي على فراقه وماكنت اتخيل اني بحس بهذا الاحساس الغريب لاني فعلا انعجبت فيه ويمكن حبيته بس بعد ماتوصل محبه زوج المستقبل.......وبصراحه كنت اسمع من بعض البنات اللي كانوا معانا انه يكلم بنات ويغازل مابلومه لانه كان مراهق وعمره 16 وانا 17 وهذي المرحله الجنسين معرضين لمثل هذي الزلات
بس اقسم بالله العظيم اني لاحظت انه طنش جميع الفتيات اللي كانوا معانا واهتم بس فيني انا ويبي يسوي اي شي المهم اكون راظيه عنه والله العالم انه ماقصر ابدن في شي وابوي ابدى اعجابه فيه
المهم انقطعت اخباره عني كنت ابغي اوصله باي طريقه لاني فعلا اشتقتله وماادري اذا هو كان يبادلني الشعور نفسه ماكنت ابغي الجأ لهذي الطريقه بس لما كنا بالسفر كان عارض رقمه على اللفت ماادري ليش المهم خذته وحده من زميلاتي وقالتلي دقيتله ورد علي وكلامه كان جدا محترم وقالتلي وانا اكلمه ابدى اعجابه فيج وقال اول مره اصادف بنت مثل اخلاقها وادبها وجمالها واهم شي انها متحجبه وبعد فتره ماقام يرد عليها لما تتصل وهزبها علشان ماتتصل
وغير رقمه وهددها مره ان اتصلتله انه راح يخبر اخوانها
خبرتني وياما كنت احذرها قلتلها عيب البنت تتصل اطيح من عين الشاب وهو يحتقرها او يخدعها وسمعت الكلام.
المهم طالت المده مااعرف اي شي عنه ولا هو ومره كانت زميلتي غير اللي كانت تكلمه زايرتني البيت وشفت عندها موبايل وطلبت منها خدمه وكنت اتحسر والله لاني ماابغي الجا لهذي الطريقه بس لاني ابغي اتاكد من مشاعره هل يستاهل اني افكر فيه او لا قلتلها تتصل برقمه كان عندي بس مافكرت اتصل انا وقلتلها سوي عمرج مغلطه وشوفيه اذا هو على استعداد انه يكلمج وانا كنت مكتفيه بسماع صوته من خلال السبيكر
في البدايه هزبها بس لما قالتله انت فلان ولد فلان قالها وين عرفتيني قالتله بعد اللي يسال مايتوه تم يكلمها فتره على اساس يعرفها عقب فتره قلتلها شو يقولج قالتلي ماشي بس شكله يلعب اتحسرت والله وقلت مايستاهل اني افكر فيه ابدن وكنت اكذب على نفسي كنت افكر فيه بس مع الايام شبه نسيته وخليت ذكرياته الطيبه في مخيلتي
لما خلصت ثاني ثانوي اتصلت فيني اللي تقربله وقالتلي يريد كتبج مال ثاني ثانوي فانا حطيت في بالي انه راح يدخل ادبي مثلي وطرشت الكتب وخلاص ماعرف شي عنه ابدن لين ماخلصت ثانويه عامه ودخلت الجامعه وكان عندي بروجكت وكنت فاتحه الماسنجر واذا بي اندهش من اضافه قبلت وقلت منو اللي ظايفني رد وقال ابغيج اليوم الفلاني والساعه الفلانيه تدخلين وبخبرج منو اكون انا
بصراحه ماكنت محطيه حد في بالي اصلا كنت اتحرا مقلب من مقالب صديقاتي
المهم دخلت مثل ماطلب مني وكنت اكلمه على اساس انه بنت قالي بخبرج انا منو .............
انا فلان بن فلان يعني هو نفسه طبعا انا انصعقت قالي اسف على الاضافه قلتله من وين لك الايميل قالي جبته وخلاص ماعندي طريقه اصارحج فيها على اللي في قلبي كنت انسان لعوب ومالي هدف من الحياه لكن اقسملج اني من عرفتج وهدفي في الحياه تغير
انا في عمري مابكيت خليتيني ابكي على فراقج وصعب الريال يبكي انتي غيرتي كيان حياتي ....وصارحني باللي في قلبه قالي 3 سنوات وانا متحمل بعدج وافكر فيج طبعا انا ماتجرات اساله عن علاقاته السابقه لو الواحد الله هداه مالنا حق نحاسبه على ماضيه وفعلا انا من النوع اللي اعرف شخصيه الواحد كان بصراحه جاد في اللي يقوله قالي ماحصلت اي طريقه ثانيه كنت ممكن الجا لتيلفون او غيره بس قلت ماشي غير هذي الطريقه ولو انها بعد غير مقبوله بس المهم ماقدرت اوصللج مشاعري ولج الحق تحذفيني
انا انصدمت لاني محيته من حياتي كيف يظهر مره ثانيه؟؟
قالي ابغيج على سنه الله ورسوله وانا كلمت اهلي عنج طبعا لاني ماقدرت اجرح مشاعره ماقلتله انه اهلي مايأيدون انه الزوج يكون اصغر عن زوجته وبعدين انا ماافكر اخذ واحد اصغر عني اعتذرت منه وكانت بينا ايميلات واحيانا كلام وخلاص انا قلتله مب عاجبني الوضع وهو نفس الشي والله العالم انه ماكان يكون بينا اي كلام فاحش مجرد تحفيزات علشان يذاكر وقالي انا علمي بس طلبت كتبج لاني مب عارف كيف اوصلج وكان مجمع سيره حياتي كلها ومعلومات
انا بصراحه تاكدت من حبه بس ماكنت اريد اعطيه مجال علشان مايصير اي شي وعقب يقول اني خنته وتزوجت غيره
وبالفعل كان يتقدملي كذا واحد بس مااوافق مش علشانه هو لا بس لاني ماكنت افكر اتزوج وهو خلص دراسه وراح يدرس برع علشان لما يتقدملي الكل يكون راضي عن مستواه
هو من عائله مرموقه نعرفهم وسمعتهم ممتازه واهله ناس طيبين وايد ...انا اعرف انه يحبني اكثر من نفسه صرت كيانه وروحه بس انا عادي المهم تقدملي واحد وقبلت بس ماعطيت اهلي جواب وفجأه قلت بطرشله ايميل علشان بس مايسمع من الناس ويقول باعتني
استغربت من رده لو الايميل اللي طرشه كان يتكلم كان ماشفت غير دموعه مغطيه الدنيا قالي شو كثر حزنه بس قالي اذا قدر يسعدج صدقيني بكون اسعد انسان في العالم بس بحسده في نفس الوقت. من
خمس سنوات وهو يحبني وقال ما
اتخيل اخذ غيرج مستحيل اغيرج بوحده ثانيه اعيش في الدنيا بدون هددف احسن وايد شباب عايشين من المسيد للبيت وانا بكون واحد منهم والله يستر عليج يارب ويوفقج يالغاليه وقالي ياريتني افكر بعقل شباب اليوم(انساها بتحصل غيرها الف وحده تتمناك) بس انا مااعتد بتمنى وحده غيرج

استغربت من رده وبصراحه عقله يوزن بلد لانه كبير باخلاقه وعقله وكل حد يشهدله والله وقالي مع هذا مابفقد الامل
وانا رفضت اللي تقدملي مااعرف ليش بس كنت ابكي لما اتذكر اللي حبني خفت اظلم زوج ماله ذنب واظلم واحد حبني كنت وايد محتاره
المهم رفضت اللي تقدملي لاتفاجا انه اهلي يكلموني عن اللي يحبني وانا اسوي عمري مااعرفه يعني مثل ماقال ماراح يفقد الامل
انا اعرف انه اصبح ملتزم وتغيرت حياته 180 درجه وانا مب مجبوره احاسبه على ماضيه علي بالحالي بس ماحطيت ف بالي انه بيتقدم ومب جذه بس اهلي كيف كلموني وانا عارفه رده فعلهم وبما انه ابوي يعرفه وامي نفس الشي قالولي الشور الاول والاخير شورج بس من كلام امه عنه انه الولد شارنج ويحبج حب ماتتخيلينه لدرجه انه دوم يدعي انه محد ياخذج غيره ومستعد يسوي اي شي المهم تكونين سعيده.
كنت اتمنى انه في انسان يحبني وياما قلت حق امي كنت دوم اقوولها ياريت يتقدملي واحد يحبني وهو يطلبني مش اهله فردت على امي قالتلي يمكن الله جعل هذا الشخص من نصيبج؟؟
امه تخبر امي تقولها كل يوم يتصل من برع يقول شو ردت البنت؟؟يقولوله بعدها هو ناوي يتزوج باسرع وقت ممكن مع انه دخل شهر 4 ال20 وانا دخلت شهر 6 ال21 انا مساله العمر وايد مهمه عندي وكنت اتمنى اخذ واحد اكبر عني بس الله حطاني في موقف يمكن لاني كنت دوم اتشمت في البنات اللي يتزوجون اصغر عنهم
لي حق ارفضه بس حاسه عمري لو رفضته ماراح اوافق على غيره واهلي متفهمين امي وابوي بس خواتي واخواني رافضين بس بعد يقولون القرار قرارج ولو اني اعرف انهم داخليا مش راضيين
انا محتاره والله قلت حق امي بعد اللي قلتيه ماراح اخذله واتخلى عنه لاني ياما اتمنيت حد يحبني واتفاجا انه في شخص يحبني موت وغير نمط حياته علشاني؟؟

سؤالي اتوكل على الله واوافق وطبعا استخرت والحمد لله ارتحت وكل يوم اشوف احلام متعلقه بهذا الشخص بس بالضبط مادري شو.
هو راح يخلص شهر 6 نهائيا ومااعرف شو راح يشتغل عقب بس هو مسافر بريطانيا على الجيش يعني عسكري وشهر 12 راح ينزل ولو تمت الموافقه راح يخطبني شهر 12 طرشتله ايميل قلتله راح اقطع ايميلاتي اتفهم موقفي وقالي الله يكتب اللي فيه الخير وانا مقدر موقفج وخلينا متوكلين على الله وعن طريق الاهل
انا اللي كنت اقول حق زميلاتي البنت لما تتزوج اكبر عنها احسن بيوقولن وين نصايحها ومب جذه بس البنت اللي خليتها تسوي مقلب وياه وهيه عرفت وجهه نظري فيه لما كلمها شو بتقول لو عرفت اني وافقت عليه اخافها ترمس من وراي وانا الحمد لله مب راعيه هذي السوالف........انا عارفه انه يموت فيني ومب ثقه والله بس كلام الكل عنه انه حبني واختارني عن صفوه الناس مع العلم انه معارفهم عندهم بنات حلوات واصغر عني وامه قالت حق امي نحنا نعرف انه بنتكم اكبر عن ولدنا ومافيها شي وخذوا راحتكم بالسؤال عن الولد ....هو بصراحه كان يدخن بس لما قتله اني مااحب اللي يدخنون ضغط على نفسه علشان يقطعها والحمد لله قطعها
هل حبه بيستمر لي بعد الزواج او انها نزوى خصوصا انه ماتهنا بشبابه وحب يحصن نفسه وخايفه مع الايام يعايرني بمساله العمر وشو بيقولن زميلاتي ليش رضت تاخذ اصغر عنها مع اني مش كبيره في السن

ادري موضوعي طويل وبتملون منه بس الله يخليكم عطوه اهتمام وردوا علي ؟لو مايهمني شوركم ورايكم ماتعبت نفسي وكتبت هذي المطوله العريضه

ممكن تحسبون الفرق في العمر
20/4/85
10/6/84

اختكم المحطمه
مسكين حالي

ومره ثانيه سامحوني ع الاطاله

اميرالعشاق · 02-10-2005, 03:51

شوفي فرق العمر مو شي - اصلا ما يعتبر فرق

ما دامك مقتنعة فيه - توكلي على الله

مسكين حالي · 02-10-2005, 03:57

امير العشاق
مشكور على الرد ،وشو تقصد انه الفرق بسيط؟؟

عاشقه حزينه · 02-10-2005, 04:15

اختى الغاليه هناك مثل مصرى يقول خدى الى يحبك و من الواضح فى كلامك انه بيحبك و بيخلصلك و مهوش قادر على بعدك ولو كانت دى نزوه لكان زهق و تركك بعد سنه او اتنين مش يحسن من وضعه علشان يفوز بيكى
توكلى على الله ووافقى ومتخفيش حبه مش هيتغير بعد الزواج
و ربنا يسعدك و يهنيكى

مسكين حالي · 02-10-2005, 04:21

عاشقه حزينه
مشكوره الغاليه على الرد الطيب والله لايهينج ان شالله

بوصالح121 · 02-10-2005, 04:29

ههههههههههههههههيييييييييييييييييييييييييييييييييي يييييييييههههههههههههههههههه الي فيه الخير
يقدمه الله ببببببببببببببببببببببببببببببببببببس النصيب ههههههههههههههو المكتوب

راهي الدمام · 02-10-2005, 05:03

توكلي على الله.. حبك طاهر عفيف ..وما دام تائب نائب فعفى الله عما سلف.. والإستخاره خير من كلامنا قل أو كثر .. وما دامك إسترحتي في إستخارتك فتوكلي على الله..

أما من ناحية فرق العمر فهو حوالي السنه ولا تهم فلا تشغلي بالك بها وعسى الله أن يبارك لكما ويكتب لكما الصلاح والإنابه وطيب المعيشه

اميرالعشاق · 02-10-2005, 06:17

قصدي ان الفرق بينكم اقل من سنة

يعني ماهي قضية كبيرة حتى لو بينكم سنة كاملة

احبك حبيبي · 02-10-2005, 08:31

اختي بالنسبه عن العمر مو مشكله، وانصحج اذا وافقتي على الزواج لا تفتحين سالفه انج اكبر منه وخلج واثقه من نفسج، الريال يحب الواثقه من نفسها ومدام هو ما عنده مشكله لا تفتحين عينه

انا ابي انبهج لنقطه مهمه، عن اخلاقه وعن مستواه المادي

لما بتتخذين قرار الزواج، حطي قلبج على صوب وشوي وفكري بعقلج

انت مثل اختي وما ابي الا الخير لج، خلي اهلج يسالون عنه عدل في الشغل وعند الجيران،

انتي هل تحسين بمسؤوليته ، هل يقدر يسكنك بروحك ولو في شقه، هاي شغله وايد مهمه، لازم تعيشين في مكان مستقل، لأن لو اليوم عشتي معاه بغرفه بكره اليهال بيون ولازم يكون في استقلاليه ، اذا ما قدر الحين مؤقتا عيشي وياه وبعدين شرطي عليه شقه
حتى ينجح زواجكم لازم يكون في تكافؤ بينكم في الأفكار والمستوى

اذا كان خلوق ويعتمد عليه وراح يريحك

استخيري الله وبعدين توكلي

الدبلوماسي · 02-10-2005, 09:54

اقتباس:

هل حبه بيستمر لي بعد الزواج او انها نزوى خصوصا انه ماتهنا بشبابه وحب يحصن نفسه

هذي امور مستقبليه يالغاليه والمستقبل بيد الله ، توكلي على الله

اقتباس:

وخايفه مع الايام يعايرني بمساله العمر

اولا ما فيه فرق بينكم في العمر ، رسولنا الكريم تزوج السيده خديجه وعمرها اكبر منه بعشرين سنه .
واذا عايرك بمسألة العمر ، عايريه بانه ذبح نفسه ليتزوجك هههههههههههه طبعا بحب وحنان

اقتباس:

وشو بيقولن زميلاتي ليش رضت تاخذ اصغر عنها مع اني مش كبيره في السن

وش عليكي منهم ؟؟ خليهم يقولو اللي يقولوه ، لن ينقص منكي شيء .
مع تحياتي

مسكين حالي · 02-10-2005, 11:01

راهي الدمام

اشكرك اخوي العزيز وماقصرت على الاطراء والتعليق الطيب والله يوفق الجميع ان شالله

مسكين حالي · 02-10-2005, 11:03

امير العشاق
اشكر رجوعك مره ثانيه لموضوعي وهذا ان دل على شي فانه يدل على اهتمام كل عضو بمحنه اخوانه الاعضاء
بارك الله فيك ويارب نخدمك في الافراح

مسكين حالي · 02-10-2005, 11:04

بوصالج121
يوم شفت ردك في البدايه كنت اتحراك تضحك على مشكلتي

اخر شي شفت انك ضاغط على الكي بورد ومطلع روحه خخخخخخخخخخخ
تسلم على ردك الطيب

مسكين حالي · 02-10-2005, 11:09

احبك حبيبي
مشكوره يالغاليه على النصيحه وعلى المشوره الطيبه بالفعل نحنا الحين نسال عنه بس الاغلب يقولون انه برع فعلشان جي مب محصلين معلومات كفايه بس قالوا يصلي وطيب وخلوق ويحب يساعد الناس؟

بالنسبه للي قلتيه انا فكرت فيه امه قالت انه راح يسكني معاهم بالبيت لانه كل واحد عنده جناح كبير واذا بغيت استغل بروحي ماعنده مانع نستقل بس انا اشوف انه في البدايه الوحده تعيش مع اهل زوجها علشان تتكيف على الوضع والزواج يباله ميزانيه
بسوالله وايد محتاره لانه حاسه انه اخواتي واخواني مش عاجبنهم بس مايقدرون يفرضون رايهم علي

مسكين حالي · 02-10-2005, 11:11

الدبلوماسي
اخوي الغالي اعتز انا وايد بردودك الطيبه واللي في نفس الوقت تخليني اضحك ساعات وتغير جو الحزن اللي فيني
ماشالله عليك ردود طيبه ومقنعه وفنس الوقت تغلب عليها روح المرح
واشكر تعليقك الطيب على موضوعي وشهادتنا مجروحه فيك

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

الله يخليكم اقروا موضوعي كامل ولاتدخلونه لمجرد الزياره..عطوني الردود والحلول الشافيه