عالم الحياة الزوجية - منتدى

~ اليمامة ~ · 15-01-2006, 16:39

بسم الله الرحمن الرحيم

أعزائي الأعضاء .. عندي لكم فكرة أتمنى تعجبكم وتشاركوني فيها
تخيلوا ان احنا في صالة انتظار المسافرين وكل واحد منا ينتظر الاعلان عن رحلته ..
طبعا مو معقولة ان كلنا بنكون ساكتين في هالصالة

وش رايكم كل واحد يعطينا نصيحة او مجموعة نصائح من خلال تجاربه الشخصية في السفر وينبه للأخطاء اللي وقع فيها عشان ما يوقع فيها غيره
طبعا ما نبغى النصائح العامة في السفر لأن كلنا نعرفها وهالنصائح ممكن نحصل عليها من اي مكان
لكن اللي نبغاه هي خلاصة تجاربكم في رحلاتكم

وراح أبدأ بنفسي
نصيحتى لكل شخص بيروح للعمرة هو أنه يرتاح وينام على الأقل ساعتين أول ما يوصل مكة وقبل ما يروح للحرم لآداء العمرة .. يعني إذا حطيت أغراضك في الفندق أو الشقة ارمي نفسك على السرير وخذ لك غفوة ساعتين

.. ولما تصحى توضأ وضوء الصلاة وتوجه للحرم واعمل العمرة .. راح تلقى ان الارهاق اللي يصيبك بعد الانتهاء من العمرة بسييييييييييييييط جدا لا يكاد يذكر .. والسر في هذا هو انك تخلصت من ارهاق السفر بالراحة اللي خذتها لحظة وصولك مكة .. كنا ظالمين مناسك العمرة ونحسب التعب اللي يجينا بعدها بسبب الطواف والسعي .. أتاريه بسبب السفر نفسه

جربوا وراح تدعون لي

هذه انا مجربتها بنفسي وحسيت بفرق كبييييييييير
اذا عندكم نصيحة أو تحذير أو حتى موقف طريف ياليت ما تبخلون علينا به .. خلونا نمضي الوقت بفايدة بدل ماكل واحد ماسك له جريدة في الصالة وحاشر وجهه بين صفحاتها الى ان يعلنون عن قيام رحلته

وخلونا نحتسب الأجر والثواب من الله في نصحنا لبعض

HaVeN · 15-01-2006, 17:14

حلو موضوعك كثير اليمامة...شوفي يا قلبي أهم شي أهم شي إذا معاكم أطفال لازم وحتما ولا بد إنه يكون معاكم شنطة صغيرة خاصة فيهم حتى لو رحلتكم مدتها نص ساعة

الشنطة تحضري فيها أكل يحبه ولدك شيء سهل وبسيط (لا تقولون فيه في القطار أو الطيارة ...يجي ولدك يقول هذا ما ابغاه وهذا ما أحبه)+ غيار + مناديل رطبة + كلينيكس عادي + كتب تلوين أو قصة + خافض حرارة والخ من أدوية الأطفال السريعة

ما اذكر الباقي..برجع بعدين أكمل إن شاء الله

أهم شي لا تنسي بنادول علشانك

King · 15-01-2006, 18:12

فكره جميله يا اليمامه نشكرك عليها جدا
لكن مش هفيدك في الموضوع لان سفري مش كثير ومعظمها سفر ليس بعيد
لكن اعتقد استارت لم تترك شئ ولكن بالنسبه للرجل ايضا لاينسي ان يصطحب معه كل اغراضه بدون استثناء حتي لا يقف موقف يحسد عليه وخصوصا الملابس الثقيله حتي لو الجو عنده غير بارد لكن لا تعلم ما هي درجة الحرارة في المكان الذي سوف تستقر به فهذا خطأ وقعت به في يوم من الايام وشعرت بالندم
اخيكم
الكنج

انسانه رايقه · 16-01-2006, 19:00

اليمامة

فكره حلوه

بصراحه مخي فاظي الحين بس بحاول اتذكر

اول شي لازم لازم والزم من اللازم(اصرف الافعال على كيفي)

يجي الواحد بدري قبل موعد رحلته بساعه عالأقل احتياط

لانو في اشياء كثير ممكن تعطله عن الرحله00 مره كنا رايحين رحلة داخليه لجده 00وتعطلنا نص ساعه بسبب مبرد اظافر وسكين00

طبعا ثلاثه واقفين يفتشون الشنطه00 ويفتشون 00بالنهايه اكتشفنا ان هذي الاشياء من الادوات الحاده الممنوعه00

وطبعا هذا الشي اخرنا وخلانا اخر ناس تركب الطياره00 لو كنا جينا بدري كان ماأثر هالتفتيش علينا00

ثاني شي

والمهم جدا جدا الهدوء بالطياره00 والله حرام اللي معاهم بزارين يعطونهم هستوب والا اكتفد من جد00

الحمدلله اخواني هاديين والا مشكله00 كان مااسافر معهم لو انها رحله حول العالم00

في ناس تعبانه ومرهقه تبغى تنام00

في رجال وحريم كبار بالسن تبغى جو هادي 00

حرام بزارين رايحه وجايه وقرف00 يعني علموهم ان اللي مايسمع الكلام ويصير هادي عطوه اكتفد00 وفي نوع من البزران ماينفع معه بالعكس ينشطه زياده00
هذا قولوله ترى بيرمونك مع الشباك
00وخوفوه يمكن ينفع فيه
>>>تكره البزران البثرين

يعني باختصار((((اللي معه بزران يحافظ على هدووووووئهم ويهجدهم بالطريقه اللي يشوفها مناسبه)))

الشي الثالث

البنات والحريم الله يهديهم يارب

اللي وهي توها راكبه الطياره بتروح بيروت والا باريس والا اي مكان برى

على طوووووول ماصدقت خبر وافصخي العبايه والمكياج الكامل والشعر المتصلح

لعنبو بليسك فشلتينا بيقولون هالحرمه مربطه بالعبايه من مهادها حتى ينومونها فيها

شوي شوي على نفسك والله قلة حيا

يعني فشله بصراحه وحده لبنانيه ناقده على حريمنا 00

هي عايشه بالرياض تقول انا اذا رحت علبنان اقعد اسبوع ماافصخ العبايه احس اني مستحيه

يعني والله حرام هنا رب وهناك مافي رب؟؟؟؟؟؟؟؟؟

الشي الرابع

(((كلو علك عند الاقلاع والهبوط يخفف من الضغط الجوي عليكم)))

الشي الخامس

لبس لباس مريح مايكون ضيق اوثقيل عالجسم بالنسبه للرجل والمرأه

ويفضل الملابس القطنيه

الشي السادس

دعاء السفر ترى دعوة المسافر مستجابه

واذا كان السفر لمكان اول مره تروحون له اسالو اسألو عنه وخذو اكبر قدر من المعلومات

احس اني طولت

عشان كذا اقول لكم اتمنى تفيدكم هالتجارب وهالنصائح

سلااااااااااااااااام

loyal heart · 19-01-2006, 01:04

نصيحتي

ممن عاشوا هذا الشي
وانا طبعا معقتد بالشي هذا من زمان

إللي يروح شهر عسل
لا يشغل حاله بأي شي غير مرته

من جد

يعني لايضيق صدرك لأتفه سبب
لا يضيق صدرك علشان جوالك ضاع مثلا

او تأخر العشاء
او اي شي

خليك كوووووول
خليك مرتاااح
ووسع صدرك

لا تضيق صدرك لأسباب فاضية وواهية بعد

هذي نصيحتي

تحياتي للجميع

انسانه رايقه · 20-01-2006, 02:44

انا بصراحه اشوف ان الموضوع مره حلووووو

ليه مافي مشاركات؟؟

اتمنى من القراء انهم يشاركون

الدبلوماسي · 20-01-2006, 07:07

يعلق الجهاز معي في هذا الموضوع هههههههههههه
وش السالفه ؟؟؟
بكره اشارك بحول الله

~ اليمامة ~ · 20-01-2006, 20:20

الف الف شكر أخواني وخواتي على مشاركتكم ونصائحكم

هافن ،، الكنج ،، انسانه رايقه ،، لويال هارت

شاكرة ومقدرة لكم جدا مشاركتكم لي في هذه الصالة

××××××××

الدبلوماسي

عسى ماشر وش فيه جهازك لا يكون زعلان علينا وماهضم الموضوع عشان كذه جايه عسر هضم قصدي تعليق

إن شاء الله يفك التعليق ويرضى جهازك علينا عشان تشاركنا

××××××××

معقولة بس مافيه غيرنا اللي قاعدين نسولف وهالناس كلها ليش ساكتين

انسانه رايقه وش رايك نروح نسحب منهم هالجرايد اللي حاشرين وجههم فيها ونخليهم غصب يسولفون لنا ويدخلون معنا الموضوع

اللي لابسين نظارات شمسية ،، معانا موجودين والا نايمين على الكراسي وانتم قاعدين

ياجماعة لاتبخلون علينا بسوالفكم .. انتظار رحلاتنا طويل ويخلي الواحد يطفش خلونا نتسلى مع بعض شوي ونستفيد من بعض

صـمـت الـوجـود · 22-01-2006, 02:58

ماشاء الله أثركم هنا مجتمعين
تراني جالسه أتفرج عليكم ياليمامه ماراح أسافر معكم..
<<<وحده ماتحب تسافر لاتقولون ليه كذا من الله ماأحب أطلع كثيير وإذا طلعت أقولهم ثاني يوم بأرجع تقل مربوطه بحبل بباب بيتنا
وإلا خايفه على بيتهم لايطير بسم الله ..

لي رجعه أكتب وش الأشياء المهمه عندي..

انسانه رايقه · 22-01-2006, 03:06

اليمامه

شكل مالنا الا كذا

بس اخاف يقولون وش جاهم ذا البني انهبلو

لا يختي اخاف ينقدون علينا

خليناا بس برستيج وثقل

الشكوى لله

شوفو تراني لين الحين رايقه

احمدو ربكم ماشفتوني لي عصبت
ماراح تنامون بالليل

ههههههههه

بتهونون حتى عن السفر

>>>تحاول تستفزهم عشان يكتبون

صـمـت الـوجـود · 22-01-2006, 17:03

هههه الرايقه ودي أرسلك أخواني ماينفع لاشباك ولاغيره ..

المهم بقولكم الأشياء اللي بنظري مهمه جداً بالنسبه لي..

ضروري معقم اليدين bailaعشان ماتضطري تغسلي يدينك بالماء والصابون كل شوي يعني هو أخف وأريح..
ماينزل من شنطتك حقة اليد..
والصابون الورق الصغير مثلاً أضطريتي تبغي تغسلي يدينك بمكان مافيه صابون ..

مصحف صغير..الأذكار ماتنزل من شنطتك..

ديتول وصابون تايد لازم وضرورررري جداً أخذهم معي <<موسوسه شوي..

مبخره كهرب صغيره وبخور لازم أهم شيء عندي عشان الريحه الحلووه حتى وأنتي مسافره..

خيط وأبره ممكن تحتاجينها بوقت زنقه وإلا شيء ..

لحاف صغير ضروري أخذه معاي ماأرتاح إلا فيه جايبته من ايكيا مخصص للسفر..

وبس إذا ذكرت شيء جيت أكمل...

انسانه رايقه · 22-01-2006, 23:24

صمت الوجود

يارايق انتا
يانظيف

ماشاء الله تبارك الله

وش هالسناعه

ياحبيلك بس

والله المفروض ننتبه لهالاشياء فعلا مهمة

الللللللللف شكر لك

من جد نصائح مفيده

خاصه اللحاف

الحين اليمامه بتروق عشان احد شارك

******حلم****** · 11-04-2006, 15:34

وينى عن هالموضوع من زمااان <<<<<< جايبه شنطها وجايه ههههههههه

بنات انا عندى مشكله لازم بكل سفرة انسى شي معين وعن جد انقهر عليه اصير مجهزته وشاريته خصوصا للسفرة وبالاخير اضطر اشترى جديد من هناك ....يعنى مو اشياء ضروريه كثير لكن احب تكون معاى
نظارتى الشمسيه دايما انساها ......السن بلوك دايما انساه ....يعنى اشياء زى كذا
عشان كذا صرت اكتب ايش الاغراض اللى باخذها عشان ما انسى شي ......

******حلم****** · 11-04-2006, 15:36

نصيحتى للى يسافر ضرورى تحجز الاوتيل اللى ناوى تسكن فيه قبل تروح وتضبط كل شي قبل تنزل هناك وتتوهق وماتلقى سكن ........
خصوصاااااااااااا بالصيف اللى كل الناس تلاقيها مسافرة والاوتيلات فل ....!!

عاشق أندونيسيا · 12-04-2006, 18:48

لمن عقد العزم على زيارة الصين وخصوصا معرض كانتون
اليكم هذه النصائح والارشادات
اتمنى ان يستفيد منها الجميع ولا تنسوني من دعواتكم الصالحة
1- استخدم الباصات للتنقل بين المدن فهي سهلة و آمنه ورخيصة .
2- يكثر في الصين الدبابات والسياكل ، فكن حذرا عند عبور الطريق أو حتى على الرصيف .
3- انتبه للنشالين خصوصا في مدينة جوانزو.
4- دائما احمل معك قارورة ماء ومناديل لعدم وجود شطافات في المياه العامة .
5- القبلة جهة الغرب وإذا لم ترى غروب الشمس اسأل الفندق عن جهة الشمال ثم اتجه نحو الغرب .
6- دائما وأبدا ازرع الابتسامة في وجهك وكن خير سفير للإسلام ولبلدك ( واحفظ الله يحفظك ) .
7- احمل معك صورة من جواز السفر فقد تحتاجه .
8- عند صرف الدولارات يطلب البنك أصل جواز السفر .
9- لا تبالغ في الملبس واستعد للمشي بحذاء مناسب .
10- قم بزيارة موقع الأحوال الجوية ( الياهو ) يوميا للاستعداد لمفاجآت الأجواء .
11- ساعات العمل للمصانع والمحلات تقريبا ما بين 9 صباحا والساعة 6 مساء .
12- احمل معك كرت الفندق عند خروجك لأي جهة معينة.
13- اطلب من احد الصينيين أن يكتب لك بعض الجمل التي تستخدمها يوميا مثل :
*أريد الذهاب لفندق ........
*أريد الذهاب لمحطة الباصات
*وصلني لمطعم .....
*..............
14- الأكل المقترح في الصين :
* مطاعم صينية ( جميع الأكلات البحرية بالإضافة لطبق الرز بالخضار والربيان )
* البيتزا هت ( بيتزا خضار )
* الماكدونالد ( همبرجر سمك )
دعواتكم

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

تخيلوا ان احنا في صالة انتظار الرحلات .. خلونا نسولف ونتبادل النصائح في السفر