عالم الحياة الزوجية - منتدى

على نياته · 25-01-2006, 21:40

تفضل وشف وش رايك

وانا اتصفح المنتدى شفت موضوع وسراحه اعجبني.
وابي ارد على الموضوع فقلت خل الرد موضوع الحاله عشان الكل يستفيد.

الي هو رد على موضوع الاخ المزيونm عن ال3000 ريال (راتب)... هل تكفي مصاريف متزوج والا لا...

وصار في الموضوع صجه ولجه ...
الي يقول تكفي...

والي تقول حتى لو خمسة الاف ما تكفي..؟؟!!

(شكلها تهد من جبل)

انا اؤيد ان يكون راتبه 3000 ريال حتى لو اقل...

الي مو راضين يقتنعون خلونا نقسم الراتب ونشوف. وبعدين احكموأ زيييين؟؟

يالله نبدا

طبعا هذا التقسيم اذا كان ساكن في بيت ملك او مع اهله والمهر من ابوه والبيت مأثث وجاهز..

(ولا ننسى الحفايل ( جمع حفاله)

...هذي عندنا في السعوديه يمكن تجي لها نقول 20000 ريال.

الراتب 3000 ريال سعودي

فواتير جوال: هو 300 وهي برضه 300 (البربره الزايد تصدع الراس...حتى انتوا يالبنات

فاتورة كهرب: بالكثير 250 ريال يعني ما راح يشتغل الا ثلاجه ومكيف وغساله وتلفزيون واحد وانوار غرفة
(طبعا الي عندها اتكيت راح تستخدم الشموع...اوفر

وين ابو البنات يعلمكم الزين..

وما فيه الا الثلاجه وهي الي تشتغل اربع وعشرين ساعة.

فاتورة مويه: 100 ريال وكثير

كم صار الحين...؟؟ (950) ريال

بنزين للسيارة :إذا هي اربع سرندل ومهوب راعي تدعيس 300ريال.
بمعدل 50 ريال كل خمس ايام

الكسوة: هو 500 وهي عشان الخرابيط حقت الحريم نقول 700 ريال عشان ما يزعلون علينا.

الاكل والشرب:
الأساسيات

الخضار: مع الورقيات70 ريال

الفاكهة : نقول 100 ريال اذا يبي من كل صنف شوي.

الدجاج: كرتون ب 50 يكفيك شهر..

الرز 80ريال ابو كاس
والا ان كانك ما تحب التنويع خذ لك طال عمرك خيشة خمسه واربعين كيلو وتقعد عندك ان بغيت ستة اشهر..

باقي خرابيط الحريم في المطيخ نقول 200 ريال من( شاهي وسكر وقهوة ومعلبات و.......إلخ

100 ريال عشاء متواضع في مطعم راقي شوي.

والباقي طال عمرك انطله في صندوق اسهم وانسه...
والراتب ماهبو باتل على كذا...اكيد بيصير فيه علاوات وبدلات
والا يشوف له شغله ثانية..اهم شي انه انشالله على بال ما يجي له عيال لين راتبه قد صار 7000 ريال وزود..

طبعا هذا اذا كان ساكن في بيت مستقل الحاله..

اما ان كانه ساكن مع اهله.

بيطيح 250 ريال فاتورة كهرب..

150 ريال فاتورة مويه..

تقريبا 400 ريال اكل وشرب...
وغير هذا كله...يمكن ياخذ موظفه.. وهذي احلى واحى . وربك يعين.

والي يبي الدح لا يقول اح...

وما ننسى قول الله تعالى (( إن يكونوا فقراء يغنهم الله من فضله ))

ان شالله اكون وفيت وكفيت واسف على الإطاله.

على نياته

(من جديد ) · 25-01-2006, 22:24

ماادري شلون حسبتها

بس تكفي الميزانية لناس مايكالوا عساقيل او مايطبخوا
ولهذا فلا يستهلكوا مونة ولا بهارات ولا زيت ولا غاز ولا مواد تنظيف

اما اذا الزوج يحب الولائم ومالذ وطاب من الطعام مايكفي
السوبرماركت لحاله مع التقشف يكلف500-600 ريال شهريا وهذا لشخصين
واذا مع الاطفال لا تنسى الحفاظات والحليب والكسوة والمستشفى في حال المرض والادوية

صعبىة يااخوي

وعن نفسي مااخذ دجاج ابو كرتون مو صحي بخلاف اني اشك في ذبحه

الواحد بعد يصير معقول

يعني فاتورة جوال ب300 كثير لناس امكانياتهم محدودة

قبل ماتصير حركات الجوال والتخفيضات كانت فاتورتي ماتتجاوز 200 ريال وطبعا من ضمنها 120 الضريبة يعني استهلك 40 ريال شهريا

الواحد يراعي بعد

روح الحبيب · 26-01-2006, 05:51

اعتقد اذا ساكن تصرف على نفسك وعلى زوجتك فقط تكفي

لكن اشياء كثيرة ما ذكرتها أخوي

ملابس ما ملابس
زيارات هدايا

وألاحظ من كلامك ما متزوج

لو متزوج كان عرفت كيف المصاريف

توجع الراس

بس الله يعين

ناس رواتبها 8000 و 10000 وفي نهاية الشهر تتسلف
شايفه نفسها

والله يعين

على نياته · 26-01-2006, 12:42

اهلين اخوي ياقلبي لاتجزن..

والله لو بطونهم خلاط اسمنت...

وبالنسبه للبهارات والزيت والغاز ومواد التنظيف الي شاغاه بالك ذكرتها مع ( خرابيط المطبخ)

اما الدجاج عندك يامال السنع ( دجاج الوطنية )...حقيقي امك تحبك..خخخخخخ

وشاكر لك اخوي وجة نظرك وبانتظار المزيد من المشاركات

روح الحبيب..

اشكرك على المشاركة..

وبالنسبة للملابس لو ترجع للموضوع وتقراه زين بتلقاني مخخصن 1200 ريال..

وبانتظار المزيد..

سلالالالام

على نياته

فمـان الجرح · 26-01-2006, 12:58

بالقناعه واليسير كل شئ يمشي

** عازف ** · 26-01-2006, 14:42

أتفق معك بشرط...

رجل عاقل ...وأنثى عاقله ...وعاشقة لزوجها.....بحيث يغطي حبها لزوجها على حبها للملابس...

700 ريال شراء ملابس في الشهر......وينها هذي اللي ماتشتري الا ب700....؟

بس يبدو لي أخوي على نياته أنك ماتدخل مع اهلك للسوق...؟والا انا غلطان..؟

لك فائق تحياتي

و صدقني فيه بيوت في قمة السعادة وبأقل من 3000 ريال ...لكن زي ماقلت رجل عاقل وامرأة عاشقة...

فمـان الجرح · 26-01-2006, 14:52

مواونه جميلة اخي عازف

عاقل + عاشقة = استقرار ورغد عيش ويحمدا الله

لحن حياتي · 26-01-2006, 16:01

ضحكتوني والله في بعض الردود

ومنها اللي تقول .. مصاريف الملابس ... كلها حدها 1200

ليه وانتوا كل شهر تشترون ملابس جديدة .

مو شرط تشترون كل شهر ... يعني كل ثلاث شهور

احسن شي . .. علشان التبذير .

وبعدين اللي متعوده على العز والفخفخة لا تقول رأيها لانها

لايمكن انها ترضى ... انا ابي اللي يردون يكونون راضيين

علشان انشوف .

انا اعرف ناس ابوهم راتبه 3000 ريال وعايشين مبسوطين وعادي

عايشين حياتهم ولا بعد الابو هذا عنده ثمان عيال .

يعني شفتوا اللي عنده عقل ويتوكل على الله راح يجيه الخير

من كل مكان وهو مايدري .

قول الله تعالى (( إن يكونوا فقراء يغنهم الله من فضله ))

وهذا كل شي عندي احب اقوله لكم .

إما ان بعض الشباب يجلسون يتعذرون والله الراتب قليل .

اقول مو حل هذا ... وبعدين تجلسون تتشكون انا ابي اعف نفسي

واتزوج وماادري ايش ؟؟؟ خلكم قنوعين برزق اللي الله عطاكم اياه .

وبعدين اللي يقولون ان العيال لازم صرف .. مو لازم تجيبون عيال

حدكم اثنين فقط .. ليه الزياده .. كل مازاد الراتب جيبوا عيال

صح كلامي ولا ..؟؟

(من جديد ) · 26-01-2006, 16:14

شوف اخي

في بداية زواجي عشنا وزوجي على مكافاة الجامعة
وعلى حظنا لغوا مكافاة المتزوجين

يعني كانت تقريبا 700ريال لان زوجي كان عليه قرض

بس وقتها ماعندنا جوالات
والسكن في الجامعة

واكلنا في البيت واتفنن في تقديمه وابحث عن الطبخات الاقتصادية اللي مافيها مواد مكلفة

ومافيه مطاعم الا اذا لقيت عرض في الجريدة او في الشارع عرض عن وجبة مخفضة
وكنا نحسب وين ارخص نشتري بخاري او نطبخ

ووين ارخص الشاورما ا و الفلافل او الفطاير
او وجبة من برغر كنج اذا الميزانية سمحت

ونشرب بيبسي ارخص من الكوكتيل

ونحاول مانمشي كثير بالسيارة حتى نوفر بنزين
ومافيه اسواق لا نتحسر واحنا ماعندنا
وكنت ماارمي شيء
يعني علب الزبادي اعملهم زبديات
وملاعق المطاعم مارميهم
والعلب او الزجاجات الفارغة اعملهم مزهريات
مانشتري ورد لانه غالي الا انه يفاجاني بتخريب الميزانية بوردة افرح بها لكني في داخلي هالخمسة ريال تعشينا
واقول في نفسي طبعا لا اكسر خاطره لو خربت البيئة بوردة من الشارع احسن

لكني احب النعناع فاعمل مزهرية نعناع الحزمة بريال واحيانا اقل ويستخدم

وطبعا المقاضي احاول اخذ الاشياء اللي مو مكلفة يعني لو مكرونة اقل بهللة اخذها وزوجي ينقهر يقول اهم شيء الكواليتي
بس مااخذ دجاج مجمد

وتمشياتنا جلسة على البحر بزمزمية شاي والماء والخضرة والوجه الحسن
او مشاهدة تلفزيون
او نروح جرير نقرا في الكتب بلوشي
او نتسلى ببعضنا

او نتناقرنضيع وقت

على قولتك ياعازف يحتاج رجل عاقل وامراة عاشقة

بس يبي لها تدبير
انا كنت احسب كل شيء لدرجة مزعجة وزوجي يغافلني ويخرب الميزانية دوما

بس المهم اللي يصمل

شوق الاحساس · 26-01-2006, 17:29

ياقلبي لا تحزن أوحييك ايتها الزوجة العاشقه على حسن التصرف والتدبير
انت باقل القليل تعيشين احلى عيشه ومبسوطه وسعيده وشكلك ماضيعتي وقتك
بالمقارنات الفاضيه وزوجك المفروض انه يفتخر فيك وانت ماتستاهلين ورده
تستاهلين باقة ورد ب300 ريال لكن مد رجولك على قد لحافك
انا زوجي راتبه 5000 واحس يادوب مكفينا انا وبنتي وهو
لكن سنسير على نهجك ايتها العاشقه

والموضوع حلو أويد عازف
تحياتي لكم
شوق الاحساس......

(من جديد ) · 26-01-2006, 20:12

مشكورة اختي شوق الاحساس

زوجي الان يهديني باقة ورد باكثر من 300 ريال رغم ان وردة بخمس ريال توصل المعنى

الحمدلله على كل حال

الاصيل يقدر العشرة

رسمت الحب · 26-01-2006, 20:34

الاخ يمكن عزوبي او ساكن مع الوالد الله يخليه لك انشاء الله حساباتك تدل انك ماتعرف شي عن مصروفات المنزل الكلام غير الفعل ماحسبت مستشفيات ولااذا تعطالات السيارة ولاحسبت قيمه الغاز ولا مصروفك الشخصي ولا ولا

مرجوووجة · 26-01-2006, 21:08

يأيد كلامي اللي قلته بذالك الموضوع
مافي مشكلة 3000 وأرد اقول الرازق الله

جزاك الله خير اخ على نياته

مدري وراه قعدت اضحك على هرجك حساباتك تضحك بس مضبوطة ماشاء الله
ههههههههههههههههههههههههه

هيا بمان الله

نديم الشوووق · 26-01-2006, 21:42

عزيزي شكرا" على مشاركتك00

الكلام سهل00والكتابه عالورق والنت سهل000وانت خصصت فئه واحده من المجتمع 000

لكن التطبيق صعب000

لاتنسى اشياء هي:

اذا كان البيت ايجار

التنقلات الوظيفيه من مدينه الى مدينه تقريبا" كل اربع سنوات(بأمر نظام الخدمه المدنيه البالي) يعني حتى لو زاد الراتب كم حيزيد راح

تزيد المصاريف0

اذا كان الزوج يصرف على ام او اب او اخوان او اخوات مع مصاريف زوجته وبيته0

لاتنسى مراجعات المستشفيات وغيرها00

والأهم جبل الديون اللي راح يواجه علشان اتمام زواجه وكم من الوقت راح يكفيه لتسديده00

ياليت كل مشكلتنا في أكل او شرب 000ولا ابوكاس00

الحياه صعبه وضغوطها اصعب ومتطلباتها اكثر واكثر

تحياااااتي لك00

نواف الولهان · 26-01-2006, 21:54

ياقلبي لا تحزن

والله لو كل الزوجات مثلك كان الدنيا بخير بالفعل انتي زوجه رائعه ومثاليه

انا بصراحه راتبي 10000 ومو قادر اوفر شي وانا عزوبي مابالك وانت متزوج بصراحه تعبت

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

من هو الي يقول 3000 ريال ما تكفي مصاريف متزوج....تعال وشوف...؟؟!