عالم الحياة الزوجية - منتدى

أم الشباب · 12-03-2006, 17:05

اسمعو قصتي وشاركوني بالراي بس استحملوني للنهاية لأنها قصه سنين .
تزوجت من 8 سنين أبو العيال واللي يوم اخطبوا أهله قالو يصلي ويصوم بس عصبي وقلت أهم شيئ يصلي ويصوم والعصبية بس ما تخيلت بالحال هذا ومن بداية الزواج وخلال الشهرين الأوائل كان جاي زوجي من الدوام وكلمته ويشهد علي ربي ولا بكلمة غلطت عليه بس اني طلبت منه شغلة وما وعيت الا بذاك الكف اللي دار وجهي ليش ماأدري وبعدها بربع ساعة جاني يعتذر وقلت يمكن أكون غلطت بكلمة وقلت يالله مادام تأسف وتدور الأيام وكان فيها من المشاكل بس كنت أطوف وبيوم بخلال السنة الأولى وبيوم كنا رادين من حماتي معزومين عندها وكنت زعلانة عليه بس قلت علشان ما تكبر المشاكل حطيت راسي أنا وولدي الأول ونمت وما وعييت الا وهو يسحبني من شعري وانا نايمة ويضربني ضرب الى ان شق طبلة اذني اللي بعدها وبمرة ثانية ضربني على نفس الاذن وسويت عملية ترقيع للطبلة بكف من ايده وقطع العقال على جسمي ليش يقول اني ما أرد عليه وانا كنت نايمة ويشيل واير التلفون علشان ما اتصل بأحد ويتركني بالغرفة ويروح ينام وانا والله ما نمت من الألم الى ان طلع الصبح ولقيت واير الكمبيوتر ووصلته بالتلفون واتصلت على ابوه وجاني واخذني عنده وما علمت أهلي وودتي حماتي للمستشفى ووقعني الدكتور على تعهد بأن الضرب مو من زوجي ووقعت وكل اللي في بالي ان يمكن اكون السبب وخلال يومين يعتذر جدام ابوه ويردني لشقتنا ويتعدل بعدها وكنت أطوف كثير اشياء من الغلط واللي كنت أشوفه من مخالفات الدين وتكرر الضرب على أشياء كثيرة منها ليش قلت مرة كل الشغل في البيت [ وكنا شرينا بيت مع بعض ] على ظهري ومرة ليش العيال [ صاروا 2 ] يوسخون الأثاث وانتي ما تشوفينهم وانا قايل لا تعطينهم ألوان وكنت اقول خلهم يتعودون على الكتابة ولحظتها كنت في المطبخ أسوي غداه وشنو سوى كسر الصحون في الصينية وسكت عنه ومرة ليش ما قلته مشكور علشان شرا لي ملابس من راتبي بس لأنه موديني للسوق ومرة ليش ناداني وما سمعته وحلفت له اني ما سمعت بس للأسف سبق السيف العدل وصار الضرب وأيام كنت أبلع وأيام أجن من انسان ما يبي المرة تزعل ولا تتضايق ولا تبين التعب ويا كثر اساعده وكنت اجيب له حتى ملابسه وهداياه وكنت أودي أمه للمناسبات وكان يدق علي ويصرخ ليش طولت وانا كنت تاركة عيالي عند اهلي مو عنده علشان لا يتضايق ومرة ضربني بالقدر الحار ليش والله ما اذكر ومرة ليش طلبت منه يودينه نتغدى بالمطعم وهو ما بغى وقلت له اذا ما تبي خلاص ما نروح ونقعد بالبيت وطلب مني أروح بروحي للمطعم مع عيالي ورحنا وهو مو مشتهي الروحة وهناك عصب ليش ما كان معاي فلوس تكمل اللي معاه
وكنت بعد السنة الأولى رحت كذا مرة لبيت أهلي مضروبة كذا مرة وكذا مرة يطردني من البيت وكانوا أهلي يرجعوني وأهله نفس الشيئ يرجعوني ويعتذر ويوعد انه ما يضرب بس للأسف ما طول مدة الوعد لدرجة انه وقع على تعهد ما يضرب بس ضربني وكرر مرات كثيرة وفي كل مرة كنت أقول يمكن أكون أنا السبب وكلمه أبوه وكلمه أبوي علشان ما يضرب بس ما كان قد الوعد وكلموه اخواني وواحد من اخواني تكلم معاه وتخانقو وضربه أخوي والله مو ضرب بس شده من ملابسه ومن يومها وهو يعايرني بالسالفة هذي وكل ما صار مشكلة ذكر أخواني وبمرة صارت مشكلة وضربني بالشارع وقدام عيالي وخادمتي ومسح فيني الأرض وزعلت ورحت بيت أهلي وبعدها جاء يتهدد على ابوي بالشرطة اذا ما رديت البيت وابوي ولا سواله شيئ وتكرر المشاكل وبيوم من الأيام شلت شنطةالرياضة حقته ورتبت المكان ونسيت أقوله وين حاطتها وكنت رايحة عند أمي مريضة بالمستشفى واتصل فيني ويسألني عن الشنطة وقلت له مكانها ودورها واتصل لانه ما لقاها وهددني اذا ما كنت عنده خلال عشر دقايق راح أشوف شيى ما شفته وبالفعل سمعت كلام وشفت ضرب لدرجة بعدها سويت عملية تجميل لوجهي وفي كل مرة كنت أزعل عند أهلي وغيرها وغيرها وفي كل مرة يقول انك تعاندين
وفي العام السابق ضربني ورحت لبيت أهلي وبعدها بفترة رفع علي قضية طلاق بانه متضرر من طلعاتي لأهلي وبعدها بأسابيع يحاول يتصل فيني ويصالحني وحاول مع كذا شخص من معارفي وصدقت انه تغير ووعدني اني ما أشوف الا اللي يسرني ووقفت القضية ورديت له وأهلي رافضين الردة بس رديت وتمر الشهور وصدقت انه تغير الى ان جاء يوم وتخالفنا وضربني بنفس الاسلوب وتكرر الضرب كذا مرة خلالها ولكنه تمادي حتى بالكلام القذر على وعلى أهلي
وسافرنا خلال السنة وكنت حامل بالولد الثالث وبالسفر ضربني ضرب دمى جسمي علشان شيئ محرمه ربي وبعد اسبوع من الضرب هذا ردينا للديرة وخلال الفترة اختلفنا وطلبت منه اروح ارتاح عند اهلي بس رفض وضربني ليش طلبت الذهاب وضربه لدرجة والله يشهد علي ربي والسالفة صارلها ألحين خمس شهور وللحين في ندبة بوجهي من كثر ضربه لي بالأرض وأنا حامل بولده اللي ما رحمه بطني ورفسه وضربني على ظهري وبعدها بيومين طلب مني أضحك وانسي اللي صار بدون أي اعتذار بس والله ما قدرت وبعدها طردني من البيت بدون عيالي والخادمة ورحت لأهلي وما علمتهم ان في مشكلة وبعد يوم كلموني عيالي يبكون وكلمني هو علشان ارجع للعيال وطلبت منه ان نتفاهم بالتلفون واذا مو عاجبه الكلام يسد التلفون وسده وجاب عيالي بجايمهم الوسخة وبدون أي ملابس وطلب مني ابوي اني ارفع قضية لأن زوجي ما ينفع معاه الكلام والنصح وبالفعل رفعت القضية وأيامها طلبت منه ملابس العيال وقال تعالي خذيهم بنفسك ولقيت انه مو خلي أي باب مفتوح من غرف البيت يعني لعانة ويشهد علي ربي ما قصرت معاه بأي شيئ سواء من زينة ولا من أكل لدرجة صار ما يحب ياكل الا من ايدي لأني انوع بأكله والله ما يذوق نفس الطبخة الا يمكن بعد اسبوعيين وحتى ان وزنه زاد من 80 الى 105 ولا قصرت بعياله ولا بتربيتهم على الدين لأنه هو يسمع الاغاني وعيالي يقولوله خطا يا بابا وحرام بس من يقرا ومن يستمع ولا قصرت بنظافة وانا موظفة وكنت ارجع واسوي الغدا لانه ما يبي من يد الخادمة وكنت ما اريح العصر علشان غداه وعلشان عياله ما يزعجونه وهم ما نفع وانا اللي كنت اودي للمدارس واجيب اغراض العيال واغراضه وحتى الطبيب .

ادري بتقولون طولت واني ليش كاتبة الموضوع والله ابي رايكم ومشورتكم بحالي ألحين لأني ألحين أحن له وما أدري ليش مع كل اللي سواه فيني وتمنيت ان الطلاق ما يتم وعز علي انه للحين ما شاف ولده الثالث واللي عمره اليوم خمس شهورواللي يوم ولاته اتصل على ابوي وغلط عليه يكلام جدا قذر والله ما ينقال لجد عياله
واتمنى انه يرجع متغير لي ولعيالي ومع اني تواجهت معاه قبل فترة بالمحكمة وسبني وسب أهلي واخواني اللي كانوا معاي ومنها عرفت انه ما تغير
بس والله اني دعيت ربي انه يجيبه معتذر وندمان على اللي سواه واطلب منكم بالنهاية انكم تدعوله يتغير ويصلح الأمور بينا ولا تقولون وين كرامتك لأني أحس اني فاقدته ومحتاجة بيتي واستقراري حتى لو بدونه
واعذروني على طول الرسالة بس ودي الكل يشارك بالراي والمشورة من عضوات وأعضاء
وفي النهاية لا تنسوني بالدعاء

mahaaaway · 12-03-2006, 17:27

الله يصبرك

الله يصبرك

الله يصبرك

ويجازيك بصبرك والايام اللي راحت الجنه

ما الومك 8 سنين وثلاث اولاد

ونار الزوج ولا جنة الاهل

ادري وحــــــــــاسه فيك

يازين البيت حتى لو الزوج بس ديكور زايد فيه

حاسه فيك ياقلبي ،،،، ومالنا الا الله

لا ترجعي مدامه بايعك

والحمدالله انتي موظفه ومانتي بحاجته

اللي يهين اهلك هينيه

وحبك اللي حن له خليه لعيــــالك ولنفسك بس هو مايستاهل
ابدا

و اصبري وابشري بالجنه هي دارك انشالله و باذن الله

بس لا تنسين تذكرين عيالك بطيبة ابوهم وانه عمره ماقصر معاهم

حتى لو كنتي تكذبين

عيشي حيااااااااااااااااتك

ترا مانعيشها الا مره بالحياة

ولا تقولين بصبر وبرجع عشان عيالي

بكرا عيالك يكبرون وكل واحد بيرووح بحياته وينشغل فيها

أختك

مهاوي

ولك من الدعاء ( الله يصبرك ويثبتك ويكتب لك الخير وين ماكان )

الفنان خالد · 12-03-2006, 17:57

أم الشباب

اختى الكريمة انتى تستمتعين بضرب

اية حياة الى انتى عايشتها الله يزيدك بصبر والله انتى غلطانة من الاول

وين كرامتك الضرب الذى يدمى ولا اهانانت الى انتى عايشتها كل هذا وتفكرين برجوع الية

اتمنا من الله العلى القدير ان تتخذى قرار صاءب

واعانك الله وعوضك خيرآ منة

تحياتى

اتعبني..طموحي · 12-03-2006, 18:20

والله الكلام سهل يا اختي
ولو قلت لك تطلقي وهذا القرار السليم في مثل حالتك
لان رجوعك له فيه خطر حتى على حياتك كل مرة من المرات الى
راحت سلمك رب العالمين بس ماتدرى المرات الجاية وش يصير
وواضح مثل عيون الشمس ان زوجك مش من الناس الى تتغيير
لو بيتغير كان تغير من زمان ..
ادري هذا قرار صعب ان الزوجة تتخذه بالذات مع وجود اطفال
بس انتي صبرتي كثير ومافي نتيجة..
عيشي الى باقي من حياتك بهدوء وكرامة ترا العمر مرة ما يتكرر
اتمنى تتخذي القرار الى يكون في مصلحتك
الله يعينك ويصبرك ..
دمتى بود

King · 12-03-2006, 18:25

اختي ام الشباب
اعتقد من يحكم من طرف واحد سيكون غير عادل في حكمه قصتك تدمي القلب وتشعر الانسان بان هناك رجال لاتعرف معني الرحمة ولكن ايضا يظل الموضوع ناقص لاننا لا نعرف القصة من طرف الرجل وهو الطرف الثاني من المشكلة ولكن مبدئيا ان مؤيد الطلاق لان الخلافات الكثير التي حدثت والضرب المتواصل لدرجة عمليات جراحية وجراحات تجميل تشعر الانسان ان هذا الرجل لن يتغير مهما سمعنا منه من وعود للتغير ولكن من الواضح انه لايأخذ براي احد ولايهتم بزعل احد وبالتالي فالحياة مع هذا الانسان مستحيله حتي وان كنتي ما زلتي راغبة بالعودة له لكن اوضح شئ لو قدرتي التحمل لمثل هذه الاهانات بدون شكوي فارجعي اما اذا شعرتي انكي لن تستطيعي التحمل فاؤيد عدم العوده له والفراق افضل في هذه الحالة
تمنياتي لكي بالتوفيق
أخيكي
الكنج

HaVeN · 12-03-2006, 18:44

أختي لن أعتابك ابدا فحتى لو كنتي اسوء امرأة في الدنيا و اجتمعت فيك كل الخصال السيئة ليس من حق اي انسان مهما كان أن يهينك نفسيا وجسديا بهذا الشكل

لا أحتاج إلى سماع قصة الطرف الآخر..لا حجة ولا سبب ولا أي كلام يعطيه الحق بهذا الكم من الإهانة والإيذاء النفسي والجسدي

شرع ديننا الكريم طريقة التعامل مع الزوجة الناشز هذا اذا فرضنا اسوء الاحتمالات ..لم يرد ايذاء وإهانة بهذا القدر

استمرارك معه واستمرار أطفالك في هذا الجو سيكون له عواقب على نفسياتهم وتكوينهم في المستقبل

اسأل الله لك تفريج الهم والكرب ..اتجه إلي رب العباد فلا ملجأ سواه

أختك في الله

طرزان بدون حبل · 12-03-2006, 19:05

انا ارى بأن هذا الرجل ليس لديه اي احساس اذا كان كلمك صحيح كما وصفتيه........
اذا ارتي الضرب والاهانه فعودي له......
ارى ان تستشيري احد اقاربك الذين لهم معرفه قويه بهذا الرجل........

أم الشباب · 12-03-2006, 22:07

شكرا أخوتي للمرور على ما كتبت ويشهد الله على اني ما زدت عليكم من حياتي معاه بل بالعكس نقصت اشياء كثيرة منها خاص جدا ومنها شيء اتناساه علشان لا يبكيني وانا اكتب لكم وعسى الله يصبرني ويعوضني بعيالي

واثق ومتواضع · 12-03-2006, 22:37

اعوذ بالله وش هالرجاااااااااااااااااااال هذا
انا مرت علي قصصص كثيره .. بس مثل هالرجال هذا ماشفت ..

يضربك دايم وبدون سبب ..
أصلاً عيب على الرجال يمد يده على بنت مهما كانت الاسباب ..
وانتي ماشاء الله عليك من قصتك واضح انك متسامحه وطيبه وماغلطتي بحقه
وأعتقد مابعد الضرب شي .. خاصة اذا تكرر أكثر من مره
يعني من ضربك مره راح يرجع يضربك مره ومرتين وثلاث
واعتقد ان زوجك يعاني من مرض نفسي مزمن .. ومستحيل يتغير الا ان شاء الله

انا ماراح اقولك اطلبي الطلاق
ولكن كلمي اهله يعرضونه على دكتور نفسي
او يذهب لشيخ يقرأ عليه يمكن يفيد معه

ولكن بشكل عام رجوعك له أكبر غلط ..

بالنهايه أتمنى لك التوفيق والسعاده
أخووووووك
واثق

شحروره 55 · 12-03-2006, 23:12

اختي ما راح انصحك بالطلاق لانك شايلته من راسك لاكن ارجعي عن طريق المحكمه على ان اذاغلط يطلع من البيت

لاانك المتضرره من خروجك انتي واولادك

(من جديد ) · 12-03-2006, 23:20

يااختي انت جبارة لتتحملي

وعدم اتخاذك موقف قوي معه من البداية جعله يتمادى خصوصا ان هذا هو اسلوبه

ايا كان المبررات فلا تجيز لرجل ان يستعرض بقوته العضلية على امراته

صحيح اللي يده في الماء غير اللي يده في النار

وكما قلتي اهله عالمين بالوضع

الخطوة القادمة هي الموت

اذا كنتي تريدين الموت اذهبي له

~®§§][][ جانيت ][][§§®~ · 13-03-2006, 02:20

صبرك وسااام شرف
ويعطى مامدى تحملك ولك الاجر حاااصل باذن الله؟؟
ام هذا الرجل لا اقول؟؟

الا حسبى الله ونعم الوكيل فيه ،،

اللهم ما سدد خطاك....ونور بصيرته ان الله على كل شئ قدير ؟؟

م-سيف · 13-03-2006, 02:54

ما قدرت اكمل الموضوع

كل ذا وصابره !!!

الله يكتبه في موازين أعمالك ....

غيـــد · 13-03-2006, 14:12

ااااااااااااااااااااخ ادميتي قلبي ......الحمد لله يارب

مشاء الله عليك وعلى صبرك بس صبرك اكيد جااااء لانك تفكرين باولادك .....

بس اقولك حرام اولادك يشوفونك كل يوم كذا وحرام اكثر يشوفون ابوهم يغلط ويضرب ويتمادى بهالشكل.....هو قدوه لهم...!!!

لو استمر الوضع كذا صدقيني بتدمرين وبيتدمرون اطفالك .....دامك حيه لين اللحين تمسكي بحياتك علشانك وعلشان اولادك

وهو حسبي الله ونعم الوكيل فيه ....انصحك اختي ان (تستخيـــــــــــــــــــــــــــري) فصدقيني لاحد يستطيع

توجيهك اكثر والهامك بإتخاذ القرار غير الله سبحانه وتعالى ....استخيري ثم استخيري ثم استيخري ......

واعملي مقارنه بين حياتك معه وحياتك من دونه .....مؤكد ستجدين الحل ....

ارجوا من الله العلي القدير ان ييسر امرك ويقدر لكِ الخير اينما كان....

اختك

غيـــد

أم الشباب · 13-03-2006, 14:43

اخوي واثق ومتواضع
اايدك وطلبت انه يروح لطبيب نفسي لكنه مو حاس انه فيه شيء واخوه قال انا راح اوديه

اختي شحرورة
الطلاق تم وكنت شايلة الطلاق لأني خايفة بيوم يعاتبوني عيالي ليش ما تحملت بس
سبق السيف العدل برفض ابوي واخواني اني ارد ويقولون خلييه يتأدب بطلقة اولى

اختي يا قلبي لا تحزن
شكرا اختي لا والله ما ابي الموت وكنت اتحمل اقول يمكن اكون انا السبب الى ان عرفت بالموقف الاخير ان زوجي قام يتمادى ولا يحشم احد لانه مو حاس بالغلط

اختي جانيت
شكرا اختي واتمنى اقول
حسبي الله ونعم الوكيل بامه وابوه اللي مالهم دور ويساعدونه

اختي م-سيف
شكرا اختي ولقد دمعت عيناي على ردك

اختي غيد
شكرا اختي وانا الحين صارلي 7 شهور عند اهلي وشهر على الطلاق ولا طاف يوم الا واستخرت وتم الطلاق .

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

عاتبوني اذا كنت غلطت بطلب الطلاق ..........