عالم الحياة الزوجية - منتدى

ام رجاء · 06-05-2006, 21:26

اللغة اللادقانية من أحلى اللغات اللي ممكن يسمعا الواحد ، و مشان تفهمو كيف طريقة اللفظ رح أشرح القواعد بطريقة مبسّطة كتير ، بعدين رح نبلّش بالكلمات المنتقاة من معجم أبو صطيف خبّيني الشهير و رح شكّل كل كلمة مشان تنعر كيف عم تنلفظ

قواعد اللغة اللادقانية:

1. في اللهجة اللاذقانية يحذف دائما اخر حرف في الجملة او
الكلمة اذا كانت
مفردة
2. في اللهجة اللاذقانية تمد الكلمة دائما ثلاث حركات مد لازم

3. في اللهجة الللاذقانية تشدد دائما الكلمات في اوسطها

4. في اللهجة اللاذقانية الافعال الضعيفة تضاف اليها كما ( نهنه ) في
مؤخرتها مثل ( اخدوهنه ) ( اتلوهنه ) ( دبحوهنه ) ( ابوهنه ) مع كسر الهاء
5. كافّة الكلمات التي تحوي حرف الألف تقلب إلى واو عريضة

الكلمات :

اهم كلمة في اللهجة اللاذقانيةهي كلمة عيّن ، حتى انو اللادقاني بينعرف من هالكلمة ، لدرجة انو مرة كان صاحبي بإيطاليا طالع بعثة مع الجامعة ، فكان بدّو يسأل واحد عربي عن شغلة، فقللو: عيّن!! فسألو الزلمة: إنت من اللادقية ما هيك؟

عيِّن = انظر

زتـّا = ارميها

اشْلفا = ارميها

ازْركو = احْشكو = حاصرو

خـَيسو = اضربو بالسكين

لمّط = لم = شيل

قـبّوع = كيس و تقال أحياناً للشخص الغبي بغيابو
أبتول = غبي
كريم (تلفظ الكاف متل الجيم المصرية)= كريم اللي يستعمل للدهن متل كريم الوش
تتشيّع = هادا الفعل حالة خاصّة جداّ ، لأنو يستعمل بدل أي فعل ، طبعاً و تشتقّ عنو الشايعة و الشايع ولكن طبيعة هالفعل بتنقال في حالة الإشمئزاز من شي أو الالإنزعاج من شيء معيّن
مسكليتة = بسكليتة الدراجة
ريحة = بارفان
جاكيّة = جاكيت
باكيّة = باكيت
خفّافة = بوط رياضة
عليا طول = على طول ولكن نادراً ما تسمع هالكلمة
السيبا = السلـّم
العمىىىىى = تقال في حالة الصدمة و غالباً من شي ما كويّس

كتّ = عبّي

إبّا = ارفعها

جلموء = مصلحجي

حمزة = يلي يحشر حالو بكل شي

معلاء = بيتدخل بكل شي

اسْكمْبري = نوع من السمك = حجش

اشْكمو= اخذلوا

يبأبــِش = يلخْبــِص= يلعب بأصابعه
بالورب = بالمايل

عواءبك = شرف العيلة

آآآ ( مد لازم 12 حركة مع فتح الفاه ) = للتعجب و الإستفهام

اعْركا = حكّا

شْـفاتير = شفايف

كلاكيش = غراض

مأنتن = وسخ

صفدعة = ضفدعة

ملنـّص = واصل عل قمة ( توب )

ضبع = طنط

إيّاعااا = إيّا عزّةةة = شَحّاري= شحميطي = للتعجب الكتير

مكن = قوي

عكّيد = أبضاي

عَمْشة = وسخ الانف

سأرأ = علبة معدنية

دَرْبَكو = دَعْتـَرو = اوقعه ارضا

زنزوءة = مرجوحة

شئليبة = قلّيبة

مْأنشِح = وسخ

ألشين = جرابات

ألْشِت = زحطت

لـْبيسة = كيلوت

أشأ = الطريق الغير معبد = خرج عن الطريق

طـَرْوَشو = صرعو

زْلاعيم = لوزات

خروء = ضعيف

اكْعَرو = اصْغـَرو = اطردو

زَمَأ = مر

بَحَت = مات

طـَشّة = أهبل

إيش ياه = شو ياه

مَكـَـنة (الكاف هون متل حرف الجيم بالمصري) = موتور

مشْنِص = نوع من الموتورات في عام ال 20

مشنص ( مصطلح ) = حظو حلو

دشّـو = تركو

أهتر = أهبل

جيعان = جوعان

هبّور = شرشوح

معتـّر = مسكين = ضريب سكاكين

تليانة = مليانة

صحفة = نفاضة سواكير

بتـّو = بنتو

أخوّي = أخي

زاوة = زاوية

كبّينة = تواليت

هردبشت = هبور

يا بو = للمناداة

لألوء = الذي يتنقل من مكان الى آخر و يلي بيلزق عليك

عليّ ما عليّ (مع تسكين الياء) = للحلفان

مَـش = دليل على اللاشيء

إتـّة = انت

فـَهْنه = يوجد

آي = نعم

بردلي = أنا بردان

بربيش = خرطوم أو مربيش

فا = يوجد

إسّا = لسّا

يحمّك = دعوة بالشر و الحمة

فلوكا = مركب الصيد المتوسط الطول

لنش = مركب الصيد الطويل و الكبير

بَبّور = سفينة

رَيسي = معلمي

ما عن طـَيبي = ما عن قصدي

يلعن سلسفيلك = يلعن اجدادك

------------------------منقووووووووووووووووووووول---------------------------------

ABU_YARA · 07-05-2006, 00:09

بحزي موضوع روعة مدام

هي المواضيع اللي بتفتح النفس
اتحفينا ولا تحرمينا من طلتك على القسم

دمتي بود
أخوكي

يوم آخر · 07-05-2006, 00:32

بجد اللهجة اللذقانية صعبة كثيييييييير

جديدة علي هههههه

يسلمو مدام أتاسي

.

HaVeN · 07-05-2006, 00:45

.

الاميررره · 07-05-2006, 03:22

لهجه جدااا رائعه دووم اسمعها

<<<<<< تحب اللهجه الحلبية وتموووت بناااس حلب اكثر شىء

دوووم نختلف انا وصديقتى على اللهجاات هي تقول لهجتها احلي واانا احب اعاااندهااا :d

الله يديم الافراااح والمحبة بين كل الشعوب العربية

استمتعت وانا اقرأ الموضوع كثيير

تقبلي فائق احترامى وتقديرى مدام اتاسي

ام رجاء · 07-05-2006, 12:18

اقتباس:

المشاركة الأصلية كتبت بواسطة ABU_YARA

هي المواضيع اللي بتفتح النفس
أخوكي

والله يا ابو يارا طالع على بالي انزل على اللادقية كتير بعد هالموضوع وقضيها هونيك على <عين عين والعمى بقلبو>

شكرا اخي الغالي على مشاركتك اللي بتسعدني اكيد

ام رجاء · 07-05-2006, 12:21

اقتباس:

المشاركة الأصلية كتبت بواسطة شمعة الجلااااس

بجد اللهجة اللذقانية صعبة كثيييييييير

جديدة علي هههههه

يسلمو مدام أتاسي

.

ولا يهمك نحنا هون بخدمة الطيبين

وكم دورة بتعمليهون وبتطلعي خالصة وبتصيري شلون ما زتيتيها بتنزت

شكرا على دخولك اللطيف اختي الغالية

ام رجاء · 07-05-2006, 12:23

اقتباس:

المشاركة الأصلية كتبت بواسطة HaVeN

الموضوع يجنن أم رجاء ...كنت أحاول ألفظ الكلمات بصوت عالي

وانشالله ظبطو بالاخير؟

شوفي حبيبتي اهم شي ما تيئسي
وشوي شوي بتجيبي اللكنة العجيبة اكيد

ام رجاء · 07-05-2006, 12:25

اقتباس:

المشاركة الأصلية كتبت بواسطة الاميررره

لهجه جدااا رائعه دووم اسمعها

<<<<<< تحب اللهجه الحلبية وتموووت بناااس حلب اكثر شىء

دوووم نختلف انا وصديقتى على اللهجاات هي تقول لهجتها احلي واانا احب اعاااندهااا :d

الله يديم الافراااح والمحبة بين كل الشعوب العربية

استمتعت وانا اقرأ الموضوع كثيير

تقبلي فائق احترامى وتقديرى مدام اتاسي

اهلا فيكي اختي الغالية واكيد اهل حلب ناس كتير ظراف كمان
شكرا على مرورك وسلميلي على صاحبتك كتير

احضان دافئه · 07-05-2006, 15:29

موضوع اكثر من رائع اختي ام رجاء
واللادقيه اجمل ما رأت عيني بسوريا
ويمكن انزوها بصيف الجاي
اذا سمحت الظروف
حياكي معنا

ღميرناღ · 07-05-2006, 16:10

انا حاولت وفشلت ببعض الكلمات

بس لح ضل عليهم للألفظهم منيح

مع انه ستي من طرطوس

تحياتي

MARLIN · 07-05-2006, 20:07

حلى شي الفهنة كلمة معبرة وتصلح لتكون فعل وفاعل ومفعول به

ام رجاء · 08-05-2006, 17:53

اقتباس:

المشاركة الأصلية كتبت بواسطة احضان دافئه

موضوع اكثر من رائع اختي ام رجاء
واللادقيه اجمل ما رأت عيني بسوريا
ويمكن انزوها بصيف الجاي
اذا سمحت الظروف
حياكي معنا

ياستي انشالله زيارة سعيدة وموفقة
بس لو حبيتي تحضري كل هالشي live لاتنسي تروحي على كل من ساحة الصليبة والعوينة هونيك حتسمعي ما تعجز عن وصفه الكلمات
وشكرا لمرورك اختي الغالية ام حسين

ام رجاء · 08-05-2006, 18:01

اقتباس:

المشاركة الأصلية كتبت بواسطة ღميرناღ

انا حاولت وفشلت ببعض الكلمات

بس لح ضل عليهم للألفظهم منيح

مع انه ستي من طرطوس

تحياتي

لا مدامها تيتة من طرطوس لازم تكون محاولاتك مضاعفة لحتى تجيبي اللكنة منيح
ومعلوماتك طرطوس واللادقية جيران وعلى هيك نحنا النا حصة فيكي مظبوط

ام رجاء · 08-05-2006, 18:04

اقتباس:

المشاركة الأصلية كتبت بواسطة MARLIN

حلى شي الفهنة كلمة معبرة وتصلح لتكون فعل وفاعل ومفعول به

ولك مارلين مابتذكري حديث دكتور ابراهيم تبع اتلوهنا وبعدين ودوهنا على المشفى اذا بتذكري المفروض تعرفي انو الفهنة تصح ان تكون حتى مبتدأ وخبر اذا بدك ...

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

تراث أهل اللاذقية ( سوريا)