عالم الحياة الزوجية - منتدى

**فـــهـــد** · 25-08-2006, 19:14

الكعبة مهيب طايرة :

كان هناك حرمه عجوز وتقدم لها رجال يخطبها ووافقوا عليه.. وكان بيجي الحج وهم قد عزموا يروحون للحج هالعام.. قالوا لها تبين نزوجك الحين ولا اذا رجعنا من الحج؟
سكتت شوي الا ورفعت راسها :
الكعبة مهيب طايررة وقاعده هي ابحج السنة الجايه ان شاءالله (عاد مايرد العجز عرسهن )

الونانة عندي في البيت:
كان فيه واحد جا عند فلاح واستضافه عنده وقدم له صحن فيه تمر , فأخذ ياكل منه بشراهه وأعجبه التمر وسأل الفلاح عن اسم هالنوع من التمر, قال الفلاح: نوعه الونانه.. قال الرجال: الونانه والله عندي في البيت (يقصد زوجته ) وإلا هاذي ماتستاهل ينقال عنها ونانة. (مسكينة هالونانه )

مايفرقنا إلا المقبرة:

خطب رجال حرمة قالت له: أخاف تطلقني لأنك رجالن مزواج وتطلق.
قالها: "والله مايفرقنا إلا المقبرة" فوافقت على الزواج.. وكان يبي يزرع في القصور القريبة من البلدة زراعة شتاء (زراعة القمح بس) وفعلا زرع هناك وبعد ماحصدوا المحصول وبيرجعون للبلدة ويوم انهم وصلوا إلى مقبرة البلدة وقف وقال لها :
أي طريق تبين تروحين له عشان اروح مع طريق ثاني؟
قالت :انت وعدت وحلفت على أن مايفرقنا إلا المقبرة !!
قال: وأنا صادق,, وطلقها وكل واحد راح بطريق وهي بطريق. ( ياهو ذكي )

العبد أسود والليل أسود:

كان عند واحد عبدين مملوكين (كلنا عبيد الله ) يرعون إبله وغنمه, وفي يوم من الأيام عصب وزعل على واحد منهم فخاف وانحاش ,وفي الليل راح الرجال مع العبد الثاني عشان يدورون اللي انحاش ومتوزي بين الأشجار الين تعبوا وهم يدورون, قال العبد لعمه:
ياعمي كيف نلقاه والعبد أسود والليل أسووووود ؟
وكان العبد المنحاش يسمع كلامه, حمممممممق عليه وعصب ليه يقول هالكلام وهو اسود مثله, وماقدر يمسك نفسه , وقال بصوت عالي :
" ولا أنت قماااااااااري ؟ " فمسكووووه ووداه لبيتهم .

الشور يعمر ويدمر:

جلس واحد مع صديقه , فاستشاره, وقال عندي مبلغ من المال وودي تشير علي وش أشتري فيه؟
قال صديقه اللي استشاره: القهوه , البن له موسم وأشوف لو تشتري كمية منه وتخزنه عندك , فإذا قل بالسوق قوم وبيعه .
فنفذ الرجال شوره وأشترى كمية من القهوة , وبعد يوم خلصت من السوق عرضها وباعها وربح فيها ربح عظيم , ومضت الأيام, وجا صديقه اللي استشاره للتاجر اللي شار عليه , وطلب من يسلفه شوي حتى يردها له بأقرب وقت , فاعتذرله التاجر, وحاول معه ولكن مافيه فايدة , وبعد فترة جاء التاجر إلى المستشار وقال له:
أنت صاحب رأي وقد شرتك العام اللي فات بالقهوة , ونفذت رأيك وربحت والحمدالله , فـ وش تشور علي هالعام ؟
ولقاها فرصة المستشار وقاله:
إذا بغيت رأيي بهالأيام وقت حصد البصل , اشتر منه كمية وخزنها عندك مدة ان قلت بالسوق قم واعرضها .
راح الرجال واشترى كمية كبيرة من البصل, وحطها بالمخزن وسكر عليها مدة طويله (ياخبل يخيس ) ويوم بغى يبيعها فتح المخزن ولقاها متعفنة وماتصلح للأكل وراح رماها برى الديرة
همن جاء للي شار عليه يعاتبه ويقول: ماكل بمجتهد مصيب , والدنيا يوم لك ويوم عليك والشور يعمر ويدمر.. ( والله يستاهل كفوه يوم سواها له وهو غبي بعد )

أولاد التاجر مع أولاد الفقير:

كان هناك رجال تاجر وله عيال. وكان له جار فقير معدم وحالته رثه وله عيال بعد وكانوا أغلب الأيام يلعبون مع عيال التاجر في بيتهم وياكلون معهم , وبيوم من الأيام كانوا يلعبون ببيت الفقير, وصادف ان عنده لحم تطبخه مرته , وتوقع أولاد التاجر أنهم يشاركون عيال الفقير بالأكل, بس ماصارت وراحوا الاولاد لأبوهم وقالوله واستغرب من الرجال الفقير وقاطعه ايام, وحس الفقير وراح لمه وسأله, فقاله الغني : عجيييييب عيالك دايم مع عيالي وهم أطفال , ويكون عندك لحمه ويشوفونها ولا يشاركون عيالك فيها ؟
قال الفقير: يعلم الله اني كنت برى سورالديرة ولقيت بقرة ميته فقطعت واحدن من افخاذها وجبتها للبيت ,ورجعت اخذ جزء ثاني منها ومالقيت شي وشكله أخذه واحدن غيري , فهي حرجه تحل لعيالي ولا تحل لعيالك عشان كذا ماعطيتهم منها .
بكى التاجر وقام حب راس الفقير وشكره واعتذر منه وراح لبيته وأرسله كمية من التمر والبر والسمن مكافاة له على اللي سواه وحرم عياله من أكل لحم الميتة .

ترى أبوي يكذب منيب صغيرة:

هليل رجالن فقير وأعمى وهو محبوب من الجميع لصدقه وامانته , وكان يعمل سقاي لبعض البيوت بقربة يشيلها على ظهره وكان بعض الناس يرسلونه عشان يخطب لعيالهم من بعض الأسر. ويوم من الايام طلب واحد منه يروح لبيت ناس يخطب بنته لولده , وراح وطق الباب واستقبله راعي البيت , ويوم دخلوا المجلس قال:
أنا جيتك من طرف فلان وانت تعرفه , وطلب مني أخطب بنتكم فلانه .
قال أبوها : ونعم الرجال وولده بس البنت صغيرة , وكانت البنت واقفه ورى الباب وتسمع كل كلامهم , وراحت لم السطح تطل من الطرمة "الطرمه هي فتحة على جدار السطح تطل بالشارع ومغطية ولها عيون ومثلثة الشكل يطل منها على الشارع عشان يعرفون من يطق عليهم " تنتظر طلعة هليل ويوم طلع نادته باسمه : ياهليل ترى ابوي يكذب منيب صغيرة .
ودرى انها موافقة وبتقول لأهلها وانتظر ايام الا وهو اتصل على أبوها , ووافق على زواجها .

ماعندي إلا خشب ومسامير:

بالعادة الاطفال لاجا قبل العيد بيوم ولايومين يلبسون ملابس العيد الجديدة ويروحون لم البيوت للتشرط ويطلبون العيدية (يازين تشرطنا ) , ومر أحد الأطفال على النجار اللي بديرته وسلم عليه وقال له:
أشرط لي ياعمي .
قال النجار: ياوليدي ماعندي إلا خشب ومسامير بس إن اوجعك ضرسك تعال نقلعه , أو أوجعك راسك تعال نكويه .
منت عليك وسلمت:

في عنيزة طلب أحد الوجهاء من واحد يجي بعد صلاة العشاء مباشرة يساعده عشان بيجونه ضيوف. وصلى الرجال بمسجد الشيخ عبدالرحمن المانع وكأن الشيخ طول بالتشهد الأخير. فسلم الرجال قبل نهاية الصلاة وراح بسرعه عشان مايروح عليه موعده, ولما جاء المدعوين كان من بينهم الشيخ عبدالرحمن ,, قال الرجال: ياشيخ عبدالرحمن تراك طولت في التشهد الأخير, ومنت عليك وسلمت . قال الشيخ: عد صلاتك, ولاعاد تمون علي مرتن ثانية

بيصلحونها على حساب الجيران:

قالت وحده لرجلها : شباك الحمام طاح.. جب واحد يصلحه.. وعدها بيجيب واحد وبيصلحه قريب. وكررت عليه كثير وقالت:
أخاف يشوفوني الجيران !
قال: تطمني لو شافوك بيصلحونها على حسابهم. ( ياحبكم للعيارة )

لوكنتي مثل ماتقولين كان ماتركوك المبصرين :

تزوج رجال أعمى حرمه , وبعد فترة أخذت تقوله:
آه لو تشوف جمالي ولو شفت بياضي وجمال عيوني و ....... إلى آخره .. فقالها:
اسكتي لو كنتي مثل ماتقولين كان ماتركوك لي المبصرين . ( قويه )

صالحة دعواي أنا وياها:

جاء رجال كبير بالسن يخطب من واحد أخته عمرها 75 سنة أو أكثر .. أعتذر له الرجال وقاله:
هي مرتن كبيرة بالسن ومريضه وماتقدر تخدمك باللي تبي... يالله حسن الخاتمه
قال الخطيب: أنا ما أبي منها شي الا انها تونسني وتقومني لصلاة الفجر بس .
ودخل اخوها يده بجيبه وطلع منها عشرين ريال ومدها له وقاله خذ العشرة واشترلك ساعة خراش (المنبه ذيك الساعه المدوره ام حديد المانيه الظاهر ) عشان تقومك لصلاة الفجر.. ردعليه الخطيب: صالحة دعواي أنا وياها ومتفقين وبقى موافقتك أنت. قال اخوها: مادام كذا.. انا موافق ولكم من ربي توفيقه إن شاءالله .

إشرب بيبسي:

واحد يتطالب هو و واحد عند القاضي, قال واحد منهم للثاني : أنت ثقيل ولاتنهضم !!
رد عليه الثاني على طول وكل برود : أشرب بيبسي ( ).

القاضي النطاح:

كان هناك قاضي ملقب بالنطاح والسبب أنه لما ينطق بالحكم يغضب المحكوم عليه , فيحاول القاضي يطلعه وان ماقدر ينطحه (حشا ثور ).. وساله الوالي عن السبب: قاله يالوالي يجيني خصمين وكلن يقول بحجته وأحكم بينهم.. فيحمق المحكوم عليه واحاول اقنعه ولا أقدر.. همن مالي الا أن انطحه (جعلك ماتحكم علي )
وطلب من الوالي أنه يحضرله أحد جلساته.. وحطوله ستارة وقعد وراها الوالي.. وجوا الخصمين عند القاضي.. ويوم سمع منهم حكم لواحد منهم , رفع الثاني صوته وأخذ يسب القاضي ويوصفله باوصاف.. والقاضي ساكت ماتكلم.. فطلع الوالي من ورى الستاره وقال :
أنطحه وإلا نطحته أنا (خخخخخخخخخخخخخخخخخخخخ )
م ن ق و ل

دانــا · 26-08-2006, 00:59

موضوع حلو ويوسع الصدر..ويشرح الحكمة والفكاهة عند الاجداد..
في قصة قد قالتها لنا امي الله يحفظها..وهي..:
كان في بنات جالسين في البيت يسولفون ويقولون لوحده منهم ..لو يجي فلان يخطبك بتوافقين عليه..قالت البنت:وع ما ابيه ابو خشم كبير..وبالصدفه كان الرجال هذا ابو خشم كبير.. يمشي عند البيت اللي هم فيه وسمعهم ..وقف وقال بصوت عالي :
خشمي كبير والسعد في جبيني***لا جيت اخطبتس من اهلتس لا تبيني..

**فـــهـــد** · 26-08-2006, 06:43

بارك الله فيك يادانا وفي اطراءك الجميل..

الله ياسوالف امهاتنا وجداتناوقصصهم الحلوه لاتبخلين علينا اذا تذكرتي شي قوليه..

**فـــهـــد** · 21-12-2006, 11:41

*رفا* · 23-12-2006, 19:47

هههههههههههههههههههههههههههههه

رووووووووووووووعة يالفهد يعطيك العافيه

من جد توسع الصدر وتونس

وخاصتا

" ولا أنت قماااااااااري ؟ "

mager x · 25-12-2006, 23:42

الحلوه حقة العبيد!!
تسلم اخوي فهد.......... لاهنت

احلام وردية · 31-12-2006, 23:56

ههههههههههههههههههههههه

الله يعطيك الف عافيه فهد من جد وسعت صدرى

عذبية · 04-01-2007, 00:50

ههههههههههههههههههههههههه

خطيرة القصص يا فهد يعطيك العافية

توني عرفت امي منين جايبة كلمة

ولا انت قماري

هههههههههههههههههههه

**فـــهـــد** · 04-01-2007, 10:44

اقتباس:

المشاركة الأصلية كتبت بواسطة *رفا*

هههههههههههههههههههههههههههههه

رووووووووووووووعة يالفهد يعطيك العافيه

من جد توسع الصدر وتونس

وخاصتا

" ولا أنت قماااااااااري ؟ "

ههههههههههههههههههههههههههههههههههههه

يعطيك العافية رفا على مرورك الكريم..

**فـــهـــد** · 04-01-2007, 10:45

اقتباس:

المشاركة الأصلية كتبت بواسطة mager x

الحلوه حقة العبيد!!
تسلم اخوي فهد.......... لاهنت

الحلو مرورك الكريم اخوي ابومحمد يعطيك العافية..

**فـــهـــد** · 04-01-2007, 10:47

اقتباس:

المشاركة الأصلية كتبت بواسطة احلام وردية

ههههههههههههههههههههههه

الله يعطيك الف عافيه فهد من جد وسعت صدرى

الله يوسع صدرك وييسر امرك مشكوووووووورة احلام وردية

**فـــهـــد** · 04-01-2007, 10:48

اقتباس:

المشاركة الأصلية كتبت بواسطة عذبية

ههههههههههههههههههههههههه

خطيرة القصص يا فهد يعطيك العافية

توني عرفت امي منين جايبة كلمة

ولا انت قماري

هههههههههههههههههههه

هههههههههههههههههههههههههههههههههههههههه

حلوووو يعطيك العافية عذبية ومشكورة على مرورك

**فـــهـــد** · 05-02-2008, 20:46

00

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

مقتطفات من القصص والنوادر النجدية..!!