عالم الحياة الزوجية - منتدى

متابعة · 18-09-2006, 21:10

السلام عليكم

ادري في ناس بيقولون مواضيعك نفس الفكرة

لكن هذا الموضوع لازم يتناقش لان كثير مو فاهمين فيه

باقتبس من كلام وحدة من الاعضاء هنا

اقتباس:

المشاركة الأصلية كتبت بواسطة OM ZEN

انا زعلت وقلت لا ........احنا اتفقنا وخلاص المهم تجادلنا لكن بأدب واحترام وفي نهاية كلامنا
قال نفسي اذا قلتلك شي تقولين طيب على طول بدون مجادلات ونقاشات ..
صراحه انقهرت منه

لانه دايم يقولي مثل هالكلام .. مدري على باله متزوج عبده مو شريكه ووضحت له اننا متشاركين في الحياه ولازم نتناقش مو كل شي حاضر وطيب وانا مو تابعه انا شريكه ...

صحيح الاحظ هالشي خاصة في زواجات خواتي

يعني البنت تكون طول عمرها عايشة براحتها وعلى كيفها ماحد يفرض عليها شي

فجأة يجي واحد يقول لها لاتناقشيني ولا تكلميني واللي اقوله يصير؟؟

ماادري هل الشي الصحيح ان البنت تلغي نفسها وتسكت على زوجها مهما صار وتمشي كلامه

ولا ان الزواج يكون شراكة؟

يعني انا احس لو باتزوج مابي انا اصير اقول سم وامر طول الوقت

ابي اتناقش اتكلم اتفلسف استهبل زي مانا الحين

صراحة لو باتزوج انسان يبيني كل ماقال كلمة قالت حاضر وسكيت فمي صراحة باحس اني مو عايشة

اش رايكم؟؟

اخــر العنقــود · 18-09-2006, 21:31

ايه صح لازم الزواج يبني على التفاااااهم والتشاور مايبنى على الاوامر

لانها هي بتشاركك حياتك وهي طلعت من بيت اهلها معززه مكرمه يعني لازم تحترمها وتقدرها وتشاورها باغلب الامور لانها هي ام عيالك بالمستقبل

والبيت اللي يبنى على التفاهم والتشاور يكون انجح من البيت اللي كله اوااااامر

واتمنى يكون الازواج انهم يطبقون على هالشي اذا يبون حيات سعيده

لان بعض الرجال يحسون انهم مايصيرون رجال الا بالاوامر والهواش لا هذا اكبر غلط

يعني انت يالرجال مثل ماتحب لنفسك وتحب احد يعبرك ويشاورك لازم تطبق هالشي على زوجتك وبيتك

وسلامتكم

متابعة · 18-09-2006, 21:41

هلا اخر العنقود

كلامك صحيح بس مادري لي الشباب دايما يتزوج وهو حاط هالفكرة براسه

صحيح يمكن امهاتهم كذا يعني يسمعون كلام ابائهم ومايناقشون بس بنات الحين غير والمفروض مايكابر ويقول ابيها مثل امي لان هو بعد مو مثل ابوه

في فروقات والواحد المفروض يتكيف معاها

لان احنا الحين بنات متعلمات ولنا راي وكلمة

والشاب اول انسان بيتضايق اذا تزوج وحدة جاهلة وماتنفع في كلمتين

يعني مايعجبهم شي؟؟ ماعرفنا لهم

منيب هينة · 18-09-2006, 22:04

هلا فييك يالغلا

للأسف هاذي وجهة نظر اكثر شبابنا في هاذه الأيام

يكوون بتفكيره..ان الرجوله ماتجي إلا بالقوه مع الحرمه

والشده..بس البنت مسكينه إذا

الله عطاها شاب من هالنوع..وش تسوي..

تصبر وتحتسب الأجر من رب العالميين..وعلى فكره الزوجه إذا عاملة

زوجها بلحسنى..والكلام الطيب والحلو تقدر تمتلك قلب الرجل

وإن عاملته بلعكس فستدمر بيتها بيديها

فهل هناك امرءه عاقله تدمربيتها بيديها؟؟

ومثل ماقال الشاعر يخاطب زوجته

((حبيبتي اوما علمتي..ان الرجال جميعهم اطفالُ))

اي تستعطيعين ان تهدئيه بعذب وأرق الكلمات

وفي النهايه اشكرك حبيبتي والله يوفقك ويعطيك ولد الحلال الي يسعدك

تحياتي..دمعة المشتاق

! سجـ FAISAL ـينك ! · 18-09-2006, 23:05

الجواب على سؤالك اختي انو الشرع جعل العصمه في يد الرجل لان لديه الحكمه وبعد النظر لانو بجد فيه زوجات لو تفتح معها باب الحوار والنقاش صارت تناقشك في كل شي وتجادلك في كل شي لانو فيه امور مافيه مجال للنقاش وفيه امور اوكي اتناقش فيها واذا راي الزوجه صح يمشي مو عيب ولكن مثل ماقلت لك الازواج يخشى الحوار والنقاش مع زوجته لانه عارف الزوجه بتناقشه في كل صغيره وكبيره وهاذا سلبي بالنسبه للرجل لانه هو الرجل في بيته ويعرف ان فيه امور لابد من الحسم فيها من البدايه ولا تحتاج اي نقاش ..

ونصيحه للزوجات مو كل شي يتناقش على سبيل المثال

زوج مرهق من العمل او تنقصه الماده تجي زوجته تقوله ابي السوق يقولها لا وتبي تناقشه وهينا خطأ النقاش لانو المفروض الزوجه تعرف زوجها وظروفه ومستحيل الرجال بيقول لها مابي اوديك السوق عشان طفران ولا عندي فلوس ومستحيل يقولها مابي اوديك السوق لاني تعبان فهو يبي زوجته تحس فيه قبل يتكلم ..

فعشان كذا ياليت من الزوجات مايتحسسون من الموضوع هاذا ولكل موقف يصير ظروفه وترى طاعة الزوج واجبه ..

سجينك

boturki · 19-09-2006, 00:36

الصراحه و التفاهم من أساسيات الزواج الناجح

متابعة · 19-09-2006, 00:53

دمعة المشتاق

اوكي انت قلتي لازم البنت تصبر وتسكت وتعامل زوجها برقة

تتوقعين البنات راح يسوون هالشي؟

لا طبعا تدرين ليه لانها ماتعودت

والبنت اللي بتضغط على نفسه وتسكت وتمشي على نفسها وعلى اللي تعودته ماراح تكون مبسوطة بتكون حياتها من دون معنى مجرد عندها الرجال يامرها وتقول سم

من دون اي ابداء لرأي او حتى رغبة

بعدين ملكته كيف يعني؟ الا قولي تتعود عليه وتقنع نفسها ان هاذي حياتها وخلاص

متابعة · 19-09-2006, 01:00

سجينك العصمة مالها دخل ولا الطلبات

الحين مثلا انا لو باجي اقول لعريس الغفلة يعني زوجي مستقبلا
اابي اطلع واحنا رايقين يقول لا اقول ليه يقول لاتناقشيني

مو بس اليوم ولا بكره ولا بعده خلاص هذا شي لطول العمر مافيه طلعة

يعني مو مثلا اليوم ماله خلق؟ لا طول عمرنا مع بعض حاط براسه مافيه طلعة

انا اعرف بعضهم يتغيرون بعد فترة بس ولو ليه يقول لاتناقشيني؟ ليه ماناقشك؟ ابوي وهو ابوي اناقشة ماناقشك انت اللي عمرك قريب من عمري وانا وياك نتشارك بيت وسرير؟

يمكن تقولون هذا الصح هذا المفروض بس لاتتوقعون ان البنت العادية بتستوعب هالشي
صراحة مرا ماله داعي اتزوج واحد يكتمني

يعني لو مايبيني اطلع عني ماطلعت بس يقنعني مو يأمرني في فرق ولا تقولون قوامة القوامة مو الامر والنهي واذا بتاخذون من الدين خذوه كله الرسول يقول بما معناه عشان انا مو متاكدة من الحديث ان خيركم خيركم لنساكم وانا خيركم لنسائي او شي زي كذا (اللي عارف الحديث يقوله)

وبعد رفقا بالقوارير

و و و

اشياء كثير بالاسلام تحث اننا نتعامل بالحسنى مو انا رجال وانت حرمة

هذا مايتعدى كونه عادات وتقاليد

متابعة · 19-09-2006, 01:01

بوتركي

شكرا على المشاركة الخفيفة

! سجـ FAISAL ـينك ! · 19-09-2006, 01:12

اختي متابعه انتي غير متزوجه عشان تحكمين على المواقف الي تصير ولا تقولين اني سمعت ولا تقولين فيه زوجات اعرفهم يشتكون لان مافيه احد يدري عن الزوج وزوجته والي يصير بينهم الا هم مهما تكلمت الوحده عن اسرار بيتها صدقيني بيكون فيه شي ناقص يعني زوجه تجي تقولك زوجي مايوديني ولا يجيبي وكل ماقوله يقول لا ولا يناقشني صدقيني قليل زوجات تقولك الحقيقه لان كثير منهم لما تطلع اسرار بيتها تبين لك ان هي المظلومه وهي تلاقينها متعبه زوجها معها ويبي يعاقبها ..

وبعدين العصمه في يد الرجل تخص الموضوع لان الرجل هو الحكيم والي له بعد نظر في الامور لان الكثير من النساء همهم الوحيد تبي تطلع وتتمشى وبس ماتضرب حسابات مثل مايضربها الرجل ..

وبعدين انتي تقولين عريس الغفله زوجك هاذا وانتي توك عزوبيه تقولين عريس غفله يعني من اولها انتي عصبيه فكيف تبين زوجك يفتح معك حوار او نقاش
وعلى فكره باين عليك ماخذه موقف من الموضوع هاذا مع العلم انك لسى مو متزوجه فلا تهتمي وانا اخوك بالكلام الي تسمعينه لان الكلام شي والواقع شي ثاني فلا تستعجلين الامور قبل تصير يمكن يكون زوجك مايرفض لك طلب ويناقشك ..

سجينك

منيب هينة · 19-09-2006, 01:24

حبيتي متابعه

الصراحه الغلط من البنت..يعني تبي تعيش في بيت زوجها

وتاخذ راحتها مثل ماكاانت في بيت ابوها..

مستحييييل يصير ذا الشي..حتى لو الرجال مدري وشلوون

والصراحه بدوون زعل..هالنوع من البنات الي يبوون يعيشوون

مثل ماكانو هاذولا يبغوون رجال ظعيف الشخصيه..وأنا ماحب هالنوع

من الرجال يكوون خاتم بأيد زوجته او اهله..مع احترامي

..اقوول عودي نفسك من الحين وخلك من الدلع الزايد

ضؤالشمس · 19-09-2006, 03:06

الحياه مبنيه على التفاهم بين الزوجين وليس الاوامر..... وأنا أتفق مع يرى أنه ليس من الضروري الاخذ والعطاء والنقاش مع الزوج في كل موضوع حتى لايملها ويمسكها الباب لأنه بعض الزوجات تبغي تمشي زوجها حسب ماتبغى مايصير ياعزيزتي وياليت الرجال والنساء الزمن هذا زي امهاتنا وابائنا أول وعموما المرأه الذكيه لهاأساليبها في إقناع زوجها وأخذه برأيها

أسـد · 19-09-2006, 04:06

ما شاء الله عليكِ إختي دمعة المشتاق بنت فاهمة للحياة عيني عليك باردة ، وأنا ضد من يحتقر المرأة ويهمشها ، لكن في بعض الأمور يمكن يكون الرجل عنده وجهة نظر ولا يبينها للمرأة أتوقع لأحد الأسباب : يمكن أصلا ما وده تطلع المرأة على السبب ، يمكن يحس لو قالها تنتبه لشي هي غافلة عنه ، يمكن السبب علشان ما تروح لناس يخربونها عليه طبعاً هذا راجع لأساليب النساء الحاسدات فيكون لو قالها السبب ما تقتنع فتكثر عليه الجدال وتفحمه بما لا طائل منه .

هذه باختصار أما لمن يتكلم عن العصمة فالله أحكم الحاكمين ولا أتكلم فيها لكن يلزمكم قرائة التفسير أدناه وأرجو ما ترد وحده إلا بعد ما تقرأ .

إنتى كلامي إلى هذا الخط
----------------------------------------------------

تفسير القرطبي

الآية: 34 {الرجال قوامون على النساء بما فضل الله بعضهم على بعض وبما أنفقوا من أموالهم فالصالحات قانتات حافظات للغيب بما حفظ الله واللاتي تخافون نشوزهن فعظوهن واهجروهن في المضاجع واضربوهن فإن أطعنكم فلا تبغوا عليهن سبيلا إن الله كان عليا كبيرا}

قوله تعالى: "الرجال قوامون على النساء" ابتداء وخبر، أي يقومون بالنفقة عليهن والذب عنهن؛ وأيضا فإن فيهم الحكام والأمراء ومن يغزو، وليس ذلك في النساء. يقال: قوام وقيم. والآية نزلت في سعد بن الربيع نشزت عليه امرأته حبيبة بنت زيد بن خارجة بن أبي زهير فلطمها؛ فقال أبوها: يا رسول الله، أفرشته كريمتي فلطمها ! فقال عليه السلام: (لتقتص من زوجها). فانصرفت مع أبيها لتقتص منه، فقال عليه السلام: (ارجعوا هذا جبريل أتاني) فأنزل الله هذه الآية؛ فقال عليه السلام: (أردنا أمرا وأراد الله غيره).

ويقال: إن الرجال لهم فضيلة في زيادة العقل والتدبير؛ فجعل لهم حق القيام عليهن لذلك. وقيل: للرجال زيادة قوة في النفس والطبع ما ليس للنساء؛ لأن طبع الرجال غلب عليه الحرارة واليبوسة، فيكون فيه قوة وشدة، وطبع النساء غلب عليه الرطوبة والبرودة، فيكون فيه معنى اللين والضعف؛ فجعل لهم حق القيام عليهن بذلك، وبقوله تعالى: "وبما أنفقوا من أموالهم".

وقال صلى الله عليه وسلم لعمر: (ألا أخبرك بخير ما يكنزه المرء المرأة الصالحة إذا نظر إليها سرته وإذا أمرها أطاعته وإذا غاب عنها حفظته "أخرجه أبو داود.

أتت النَّبِيّ صَلَى اللَّهُ عَلَيْهِ وَسَلَم امرأة معها صبيان لها. قد حملت أحدهما وهي تقود الآخر. فقال رَسُولَ اللَّهِ صَلَى اللَّهُ عَلَيْهِ وَسَلَم (حاملات، والدات، رحيمات. لولا ما يأتين إلى أزواجهن، دخل مصلياتهن الجنة).

شرح الحديث(حاملات) يعني النساء (والدات مرضعات رحيمات بأولادهنّ) أي لا يزلن كذلك فهن خيرات مباركات (لولا ما يأتين إلى أزواجهن) أي من كفران العشرة ونحوه (دخل مصلياتهن الجنة) في إفهامه أن غير مصلياتهن لا يدخلنها

ام الوناسه · 19-09-2006, 11:12

أسمعو عاد يابنيات انتو بعد فيكم عيوب الا عيوب الدنيا

انتم تقولون مدري ليش الشباب ماخذين فكرة ان لازم الحرمه تطاوعه في كل شي

طيب وانتن يابنات ليش ماخذات فكره انه لازم الرجال ياخذ لها راي وشور ولازم تناقشه

بس انا بقول لكم شي الحرمه الذكيه أهي الي تطاوع زوجها بالي هو يبغاه أهم شي أنه مايكون متعدي حدود الله
لأن النقاش من وجهة نظر الرجال مجادله ورفض لذلك تقول له أن شاالله تريح زوجها وتريح نفسها وراسها

انا أبظرب مثل حي صار معي قلت له متى بنروح نتقضي لرمضان قال وانتي وش لزومك تروحين معي يعني مافيه رجال في البيت ولا لازم تقطين وجهك وتروحين للأسواق قدام خلق الله أجلسي وشدي أرضك فقلت أن شاالله الي تشوفه
بعد ثلاث أيام جاني وقال وش رايك تروحين معي نتقضي أخاف أجيب شي ماتبونه ولا أنسي شي تبونه قلت يله [[الله يعين مخباك ]]

لاكن تخيلي0000 لو أني ناقشته وقلت ليش ماأروح وش شايف فيني انا محتشمه ومتغطيه انا بروح أغازل أنا بروح أتقضي لك ولعيالك[[ جعلكم ماتاكلونه]]
وهو يقول خلاص لازم تجادلين كلمه وقلناها وخلاص قولي ان شاالله وبس

وانا أقول أيه ماأختلفنا بس أبي أفهم ليش ماتبيني أروح

وهو يقول الظاهر أنك منتيب ساكته بالعه رادو يمال الطرم قلنالك خلاص أنتي تعاندين بس عناد فيك ماني متقضي لكم أبد عساكم تموتون من الجوع

وكلمه مني وكلمه منه وخسرت المقاضي ووجعت راسي وزعلت زوجي

لا كن كلمة ان شاالله حللللللللللللللللللللللللللللللللللوه وتحل كل المشاكل
لأن الرجال بطبعه يحب الحرمه الي تسمع كلامه وإذا مشت على هواه والله غصب عليه يمشي على هواها بس بدون يحس

وسلامتكم

The Man · 19-09-2006, 11:36

I agree with below

اقتباس:

المشاركة الأصلية كتبت بواسطة ضؤالشمس

الحياه مبنيه على التفاهم بين الزوجين وليس الاوامر..... وأنا أتفق مع يرى أنه ليس من الضروري الاخذ والعطاء والنقاش مع الزوج في كل موضوع حتى لايملها ويمسكها الباب لأنه بعض الزوجات تبغي تمشي زوجها حسب ماتبغى مايصير ياعزيزتي وياليت الرجال والنساء الزمن هذا زي امهاتنا وابائنا أول وعموما المرأه الذكيه لهاأساليبها في إقناع زوجها وأخذه برأيها

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

عالم الحياة الزوجية - منتدى

شراكة؟ ام تبعية؟