السلام عليكم
يالله يامجري القمـر مـن مغيبـه
يامرجعه للشرق من عقب تغريـب
تفرج لعين مـن وجعهـا مريبـه
عيّا يفيد بهـا الـدوا والتطابيـب
هذا لها خامس شهـر مستصيبـه
بين الرجا والياس والخبث والطيب
على الذي من دونـه ارض تعيبـه
مـا ياصلنّـه متعبـات المناجيـب
ليت الهبوب اللي تجينـي تجيبـه
لاشرّقت من نجد من غير تجنيـب
لين اني اقضب مقدمه والتوى بـه
عقب التفـرّق والبطـا والتغاريـب
يقرا لمظموني وانـا اقـرا لغيبـه
سرايـر تكشـف بليّـا مكاتـيـب
اللي على فـراق شوفـه غصيبـه
نهار قفّينا علـى الفطّـر الشيـب
ادعج غنج كنّـه عيـون الربيبـه
شيهانـة تفـرس بكـل المخاليـب
المترف اللـي مايماتـع صويبـه
جرّبت منه وكـل شـي بتجريـب
العين خرسا من طربهـا غضيبـه
فيهـا لطـرّاد المـودّه مغالـيـب
والراس ذيل اشقر يشعشع سبيبـه
يسبـق اذا جـنّ السباياجنـاديـب
والخد قنديل الدجـا ينسـري بـه
عليه من شغل النصـارى كواليـب
وعوده كما البردي ليـان رطيبـه
يومي به النسناس بيـن النبانيـب
وملامـس مانشـت منهـا لبيبـه
الين من الديباج دمـث المقاضيـب
وريحه كما ريح الزهر في شعيبـه
في مربع علّه من الوبـل تشعيـب
ممطور امس ومـدرس ماوطيبـه
واليوم شمس وفاح طيب على طيب
لاوهنـي الذيـب يرفـع قنيـبـه
وانا قنيبي بالخفـا شقًـت الجيـب
ماوالله اصخي به وانا خاطري بـه
لو غتّرت سود العوارض من الشيب
يا اهل الهوى سود الليالي صعيبـه
ياما سمعن بفراقهم عقـب تقريـب
خـطّ بسجلـي مالغيـري قريبـه
عطف بلطف واجتمـاع وترحيـب
وصلوا على سيـد البرايـا طبيبـه
ماافتـرّ دولاب الهـوى للطواليـب
للشاعر الكبير / سليمان بن شريم رحمه الله