الغش في الاختباااار ماني من أهله ( أنا من فئة الدوافير .. ) ..
بس ترى ( حنا الدوافير ) لنا معاناة ما يعلمها إلا الله .. ترى نعرف حركات التلزق اللي ما تطلع إلا بآخر السنة .. لكن من غبائي تلقاني أشرح للبنات وأفهمهم بكل طيبة .... وأتذكر موقفين مؤلميييييييين يوم كنت برابع ابتدائي ... كنت أشرح لمجموعة من البنات وأنا مجتهده وأقولهم هذا مهم وهذا بيجي ... وكل اللي قلته تجيبه المعلمة في الاختبار .. وبعد ما طلعوا الحلوات من الاختبار نشروا في المدرسة أن المعلمة معطتني الاسئلة ...واليوم الثاني وتجيك المدرسة بكبرها كل البنات ها وش بيجي في الاختبار - طبعاً إجتهاداً مني ..ولسى ما دريت عن الاشاعة - قلتلهم على الاسئلة المهمة .. وبعد ما جت الاسئلة كانت مختلفة فأنصدموا البنات وأشتكوني على الادارة .. وتمسكني المديرة وهاتك يا هواش ( وهذا وأنتي يقولون عنك ممتازة وتسوووين كذا .. و.... و.... - ويليتني قدرت أدافع عن نفسي , بس دموعي هماليل وأنا منزلة راسي ) ..
لا ومن زين الفعايل جاياتني اليوم الثاني عشان أشرحلهم اللي ما أفهموه !!!!!!!!!!!!!
والموقف الثاني ( طبعاً أنا الأولى على المدرسة - كنا فصلين أ و ب - ) جايتني المعلمة اللي تراقب - وكنت أحبها كثيييير - تناظر ورقتي وتقارنها بورقة وحدة تعرفها وتنقلها الاجابة الصح .. وياليت جت على كذاا .. لا سمعتها بعد الاختبار تقول للبنت ( لا تخلين هالبدوية تاخذ عنك المركز الأول ) يااااني بكيت .... طيب وش ذنبي ؟؟!!
الله يا ثلاثيني هيجت الذكريات .. كنت أكبر أخواني واللي تحتي على طول ولد ( يا حبي له ) وكانت شخصيته هاديه وما هو راعي هوشات ويميل للإنطوائية .. بعكس شخصيتي في ذاك الوقت .. المهم دااااايم وأنا في مضاربات علشانه .. مرة ما أنساها كان يوم خميس وأبوي قايل له يروح المخبز الصبح ويشتري لنا خبز .. ما أدري وش اللي لقفني وأروح وراه ... وألقى أثنين واقفين على راس الشارع - واحد من قدامه والثاني وراااه ويقولون له جيب الفلوس ... وهو رافض .. طبعاً أنا خذتني الفزعة وطبيت عليهم وهو يوم شافني تشجع .. وعينك ما تشوف إلا النووور هاتك يا ضرب ( بقوس ونعال وحصى وكل ما يقع تحت اليد - العجيبة إنك وقتها ما تحس بالألم - ) المهم خرجنا من المعركة منتصرين بعد أن فلقت أكبرهم بحصاة يحبها قلبك .... ويا عيني على نشوة الانتصااار ... اللي ما خذت إلا نص يوم .. لأن - الله يسلمك - الولد اللي فلقته جاب لي أخوه اللي أكبر منه وولد عمه وأنتظروني ( زبنوا في عشة جيرانا ) وأنتظروني لين طلعت من البيت العصر للدكان مع بنت جيرانا .. ولما أبعدت شوي عن البيت طلعوا لي - مخمخ ومشمش - وهنا عينك ما تشوف إلا الظلااااام ياأني أنضربت ضرب ( لو ينضربه الكافر أسلم ) المشكلة ما خلوا لي فرصة أبرر وإلا أقول كلمة هو أشر علي وهم أستلموني .. ولا قالوا بنت ضعيفة ومسكينة بنرحمها ... ياعيني علي .. وطبعاً هم كانوا شغالين ضرب وأنا مالي أي مهرب والدجاجة اللي معي حاطة يدها على فمها وتبكي ولا حركت ساكن ... وأنا أنضرب وأقولها : نادي أبوي .. نادي فلان ...وما أحد حولك الخوف مجمدها .. ويطلع لي واحد كان أيامها في المتوسط من عيال جيرانا اسمه منصور الله يذكره بالخير ويفكني منهم ويتضارب معهم .. وتحسب إني هربت وإلا تركتهم والله إنه يضربهم وأنا معه - دماني تصبصب - وأنا أكفخ والله من ىحرّ ما اونس ... المهم عقبها ما دخلت في هوشة مع عيال مباشرة .. أضرب بللي يتهيأ بس من بعيد ... وطبعاً الأخ منصور عقبها ما يشوفني في مضاربه مع عيال إلا يهاوشني ويطردني لبيتنا ... ومرة علّم علّي أبوي وبعدها كرهته وما أشوفه بالشارع إلا أصد عنه ... ( وبني وبينكم أكش عليه ) ..
هذا في الابتدائي أما المتوسط .. أنقلبت شخصيتي من الجامحة إلى الهادية .. ولا زلت على تفوقي - ولله الحمد والمنّة - وفي نهاية السنة حصلت على المركز الخامس على مستوى المحافظة .. وهنا حصل لي موقف ما أنساه - طبعاً أنا في ذيك الفترة تزوجت ورحت مع زوجي للشرقية - وبداية السنة نادوا إدارة التعليم الوالد عشان يستلم شهادة التفوق من مدير التعليم في حفل تكريم المتفوقين والمتفوقات .. وطبعاً لما زرتهم في الاجازة طلّع لي أبوي الشهادة وأعطانياها وقالي - وهنا المأساة - ياليتها لواحد من أخوانك ... أنا بكييييييت ... طيب وأنا يا بوي ما أشرّف .. أنا عارفة قصد أبوي ومقدرته لكن حزّ في خاطري كثييييير ..
والثانوي كانت نسبتي 98% .. وهذا وأنا متزوجة وربة بيت - بلحالي -
والجامعة .. الخامسة على الدفعة .. وكل هذا من فضل ربي ..وترى ما كتبت من الموااااقف إلا أبرزها وإلا ترااااها - لو با كتبها ما يكفيها مجلّد -
بس ترانا - الدواااافير - كاشفينكم يالغشاشييييين ... ويمكن بعضنا طيبين لكن والله ما حنّا سذج واللي نمشيه نمشيه بكيفنا .....
ثلاثيني موضوع رااااائع كعادتك وعذراً للإطالة ..